Өмнө нь Их Британийн колони байгаад Хятадад шилжсэн Хонконгийн автономи эрхийг хүндэтгэж, үүргээ биелүүлэхийг БНХАУ-ын эрх баригчдад АНУ, Их Британи улс уриалж байна гэж АНУ-ын Төрийн нарийн бичгийн дарга Майк Помпео, Их Британийн гадаад хэргийн сайд Раабтай утсаар ярьсныхаа дараа мэдэгдлээ. Майк Помпео, Доминик Рааб хоёр Бээжин Хонконгийн үндэсний аюулгүй байдлын тухай хууль гэгчийг дангаараа санаачлан гаргах гэж байгаад сэтгэл зовниж байгаагаа ярилцжээ.
Төрийн нарийн бичгийн дарга, гадаад хэргийн сайд хоёр Хонконгийн хөгжил цэцэглэлт, тогтвортой байдлыг хангах талаар тусламж үзүүлэхэд бэлэн байгаагаа илэрхийлээд Хонконгийг шилжүүлэн өгөх үеэр Хятад-Британийн хамтран гаргасан тунхаглалд заасан үүргээ БНХАУ биелүүлэх ёстой хэмээн мэдээлэлд дурджээ. Хоёр сайд бас “Хонконгийн автономийг эцэс болгох гэж байгаа Бээжингийн үйлдэлд хариу өгөх”-ийг олон улсын хамтын нийгэмлэгт уриалсан байна.
Майк Помпео АНУ-ын Конгресст 1997 онд Их Британиас Хятадад шилжүүлэн өгсөн Хонконг цаашид автономи байхаа больж байна хэмээн мэдээлсэн. Гэхдээ энэ талаар АНУ-ын Засаг захиргаа юу хийж болохыг дурдаагүй өнгөрчээ. Хонконгтой холбоотой үйл ажиллагааных нь төлөө БНХАУ-ын эсрэг хориг тавих асуудлыг авч үзнэ гэж АНУ-ын Засгийн газар үүний өмнө мэдэгдэж байсан. Хонконгийн үндэсний аюулгүй байдлын тухай хуультай холбоотойгоор Америкийн эрх баригчдын мэдэгдлийн хариуд БНХАУ ч бас Хятадын эрх ашгийн эсрэг арга хэмжээ авах юм бол Бээжин хариу барина гэсэн.
Хонконгийн Засаг захиргааны тэргүүн Керри Лэм харин энэ хуулийн төслийг дэмжиж байгаагаа илэрхийлээд ийм хууль гарснаар Хонконгийн ард иргэдийн эрх, эрх чөлөөнд сөргөөр нөлөөлөхгүй гэсэн байна. БНХАУ-ын эрх баригчдын зөвхөн Хонконгт зориулан санаачилж боловсруулаад Бүх Хятадын Ардын төлөөлөгчдийн их хурлын чуулганаар хэлэлцэж байгаа Хонконгийн үндэсний аюулгүй байдлын тухай хуулиар бол аливаа салан тусгаарлах оролдлого, төв Засгийн газрын эсрэг ямар нэг үйл ажиллагаа, терроризм, хөндлөнгийн нөлөөллийг хориглож байгаа юм. 

ЭХ СУРВАЛЖ: "АРДЧИЛАЛ ТАЙМС" СОНИН