БНХАУ-ын эрх баригчид зөвхөн Хонконгт зориулж үндэсний аюулгүй байдлын хууль санаачлан хэлэлцэж байгаа нь салан тусгаарлахад чиглэсэн аливаа үйл ажиллагааг хориглож байгааг эсэргүүцэгчид Хонконгт жагсч эхэлсэн байна. Хэдийгээр орон нутгийн удирдлага энэ хуулийн төслийг ард иргэдийн эрх, эрх чөлөөнд сөргөөр нөлөөлөхгүй, энгийн л нэг хууль тогтоомж гэж байгаа ч түүнийг эсэргүүцэгчид өөр өнцгөөс харж байгаа аж. Хотын янз бүрийн байрлалд болсон хууль бус жагсаал цуглаан, эмх замбараагүй байдлын үеэр хууль сахиулагчид 300 гаруй хүнийг саатууллаа гэж хэвлэлүүд мэдээллээ. Хотын Монгкок дүүрэгт зам хааж, зам дээр хог, хадаас хаясан байна. Хонконгт ийм эсэргүүцлийн жагсаал цуглаан 2019 оны зунаас эхэлж, олон нийтийг хамарснаас хууль сахиулагчид зарим үед хүч хэрэглэхэд хүрч байгаа.
Бүх Хятадын Ардын төлөөлөгчдийн хурлаар хэлэлцэж байгаа Хонконгийн аюулгүй байдлын тухай хуулийг эсэргүүцэгчид тавдугаар сарын 24-нд хотын худалдааны дүүрэг Козуэй-Бейд цуглаж эсэргүүцлээ илэрхийлсэн. Тэд БНХАУ-ын эрх баригчид Хонконгийн хууль тогтоогчидтой зөвшилцөж, саналыг нь авалгүйгээр дангаараа ийм хууль гаргах гэж байгааг эсэргүүцэж байгаагаа илэрхийлжээ.

ЭХ СУРВАЛЖ: "АРДЧИЛАЛ ТАЙМС" СОНИН