Турк улс Сири лүү хүнд зэвсгүүдээ татаж байгаа нь өнгөрсөн сарын 30-нд тодорхой боллоо гэж avia.pro хэвлэл мэдээлсэн байна. Энд Оросын дэмжлэгтэй Сирийн армид ихээхэн хохирол учруулах хүчин чадалтай артиллерийн М110 суурьтай 200 мм-ээс багагүй калибртай өөрөө явагч их бууны тухай ярьж байна. Мөн Ливид болж байгаа зөрчилдөөний улмаас Туркийн их буучид Оросын цэргийн байрлалд цохилт өгч магадгүй гэдгийг мэргэжилтнүүд үгүйсгэхгүй байна. Турк хүнд зэвсэглэлээ Сири рүү яагаад ийнхүү татаж байгаа нь одоохондоо тодорхой биш байгаа ч мэргэжилтнүүд болохоор Сирийн арми Оросын цэргийнхэнтэй хамтраад Идлиб мужид алан хядагчид, террористуудын эсрэг цэргийн томоохон ажиллагаа эхлүүлэхээр бэлтгэж байгаатай холбоотой байх гэж мэргэжилтнүүд таамаглаж байна. Гэхдээ үүнийг хараахан баталгаажуулаагүй байна.
Энэ бүс нутагт Турк улс Сирийн цэргийнхний эсрэг идэвхтэй тэмцэж байгаа. Гэхдээ Турк энэ бүсийн тухайд Оростой яриа тохиролцоотой боловч гурван сар өнгөрөөд байхад өөрийн үүргээ биелүүлэхгүй өнөө хүрч байгаа юм. Террористууд ч энгийн ард иргэдийг алан хядах ажлаа үргэлжлүүлж байгаагаас Орос улс Анкаратай хийсэн хэлэлцээрээ зогсоож харин Сирийн цэргийнхэнтэй хамтран Идлиб мужид шинэ давшилтын ажиллагаа эхлүүлэхээр төлөвлөж байгаа гэсэн мэдээлэл байна.

ЭХ СУРВАЛЖ: "АРДЧИЛАЛ ТАЙМС" СОНИН