Оросын төрийн өмчийн “Гознак” компани “Ливийн 1.1 тэрбум үндэсний мөнгөн тэмдэгтийг хуурамчаар үйлдвэрлэсэн” хэмээн АНУ-ын Төрийн департамент буруутгалаа. Төрийн департаментын албан ёсны сайтад нийтэлсэн мэдэгдэлд энэ мөнгийг “хууль бус эрх мэдэлтнүүд” захиалгаар хийсэн гэжээ. Нэгэнт хэвлэсэн хууль бус мөнгийг Мальтын аюулгүй байдлын алба илрүүлсэн байна. Ливийн нийслэл Триполи дахь Төв банк нь тус улс дахь цор ганц хууль ёсны банк гэдгийг Төрийн департамент онцолжээ. “ОХУ-д хууль бусаар хэвлэсэн энэ мөнгөний урсгал Ливийн эдийн засгийн хүндрэлийг улам гүнзгийрүүлнэ” гэж энэ мэдэгдэлд дурдсан байна.
Төрийн департамент “Ливи дэх нөхцөл байдлыг тогтворгүй болгохоо Орос зогсоох ёстой” гээд Ливийн тусгаар тогтнол, аюулгүй байдлыг хангахын төлөө АНУ-ын зүгээс НҮБ болон олон улсын түншүүдтэйгээ хамтран ажиллахад бэлэн байна гэжээ. Фельдмаршал Халиф Хафтарын удирдсан Ливийн үндэсний арми нь олон улсын хүлээн зөвшөөрсөн Триполид төвтэй Фаиз Саражийн тэргүүлж байгаа Үндэсний эвслийн Засгийн газрын эсрэг үйл ажиллагаа явуулсаар байгаа. Нутгийнхаа зарим хэсгийг хянаж байгаа фельдмаршал Хафтарыг Орос улс дэмжиж байгаа. Үүний өмнө Орос улсыг тус улсад орчин үеийн МиГ-29 болон Су-24 зэрэг 14 сөнөөгч онгоцыг хөлсний цэргүүдийн тусламжтайгаар оруулсан гэж буруутгаж байсан юм. Харин Орос улс үүнийг няцаасан билээ.

ЭХ СУРВАЛЖ: "АРДЧИЛАЛ ТАЙМС" СОНИН