ОХУ-ын Үндсэн хуульд өөрчлөлт оруулах Бүх нийтийн санал асуулгыг ирэх долдугаар сарын 1-нд явуулна гэдгээ Ерөнхийлөгч Владимир Путин Үндсэн хуулийн өөрчлөлтөд бэлтгэх ажлын хэсгийнхэнтэй уулзах үеэрээ зарлалаа. Санал асуулга явуулах өдрийг товлосон Ерөнхийлөгчийн зарлигийг Кремлийн албан ёсны сайтад нийтэлжээ. Зарлигт зааснаар энэ өдрийг амралтын өдөр болгох юм байна.
Үндсэн хуульд өөрчлөлт оруулах ажлын хэсгийн төлөөлөгч, Төрийн Думын Хууль зүйн Байнгын хорооны тэргүүн Павел Крашенинников бас Оросын иргэд саналаа зургадугаар сарын 25-наас долдугаар сарын 1-ний хооронд өгч болно, харин саналын хуудсыг долдугаар сарын 1-нд л тоолно гэж РИА Новости агентлагт мэдээлсэн байна.
Өмнө нь оросын Сонгуулийн төв хорооны тэргүүн Элла Памфилова бас “Санал асуулгыг ганцхан товлосон өдөр биш, үүний өмнөх зургаа хоногийн турш авна. Энэ бол сонгуулийн насны иргэд аль болох бөөгнөрөл үүсгэхгүй, олонтой хавьтахгүй, халдвар авалгүйгээр энэ зургаа хоногийн хугацаанд боломжтой цагтаа саналаа өгчхөж болно” гэж байсан юм.
Харин иргэдийн саналыг шуудангаар авахгүй гэж хатагтай Э.Памфилова онцолжээ.
Оросын Мэргэжлийн хяналтын газрын тэргүүн Анна Попова болохоор санал асуулга явуулах нь улс оронд халдвар тархалтыг нэмэгдүүлэх, нөхцөл байдлыг муутгах үндэслэл болохгүй гэсэн байна. “Бид олон улсын туршлагыг судалсан, өөрийнхөө эрдэмтэн судлаачдын санал, байр суурийг сонсч, халдвар тархах эрсдэлийг бууруулах заавар, аргачлал боловсруулсан” гэж хатагтай А.Попова хэлжээ.
ОХУ-ын Үндсэн хуульд өөрчлөлт оруулах талаарх бүх нийтийн санал асуулгыг өмнө нь дөрөвдүгээр сарын 22-нд явуулахаар төлөвлөж байгаад коронавирусийн халдварын тархалтаас болоод хойшлуулсан юм.

ЭХ СУРВАЛЖ: "АРДЧИЛАЛ ТАЙМС" СОНИН