Япон тэнгист мягмар гарагт 6.7 магнитудын хүчтэй газар хөдөлсний улмаас 15 хүн нэрвэгдлээ гэж тус улсын Засгийн газар мэдээлснийг мэдээллийн Kyodo агентлаг лхагва гарагт дамжууллаа. Ямагата аймагт есөн хүн гэмтэж бэртсэн бол Нигата аймагт дөрөв, Мияги, Ишикава аймагт тус бүр нэг хүн бэртсэн байна. Газар хөдлөлийн улмаас энэ бүс нутгуудад хөрс гулгах аюул нүүрлэж болзошгүйг японы Үндэсний цаг уурын алба анхааруулж байна. Бас ойрын өдрүүдэд Ямагата, Нигата аймгийн нутагт саяныхтай ойролцоо хүчтэй газар хөдөлж магадгүй гэж мэдээлснийг Kyodo агентлаг мэдээллээ. Газар хөдлөлийн төв нь Ямагата аймгийн эрэг орчим Япон тэнгист 10 км-ийн гүнд 6.8 магнитудын хүчтэй байсан ч чичирхийлэл нь 6.7 магтнитуд болтлоо суларсан гэнэ. Газар хөдөлсний дараа магнитудын 4.1 хүчтэй чичирхийлэл үргэлжилсэн байна.
Газар хөдлөлийн дараа цунами болно гэж эрх баригчид мэдээлж байсан ч азаар бололгүй нэг метрийн өндөртэй давлагаа үүсээд өнгөрсөн байна. Гамшгийн улмаас хэдэн мянган байшин сууц гэрэл цахилгаангүй болжээ.

Эх сурвалж: АРДЧИЛАЛ ТАЙМС СОНИН