Орос улс тухайн бүс нутгийн дотоод хэрэгт оролцож байгаагаас болоод Тунис улс руу АНУ тусламжийн цэргийн бригад илгээж магадгүй гэж АНУ-ын Зэвсэгт хүчний Африкийн командлагч генерал Стивен Таунсенд Тунисын Батлан хамгаалахын сайд Имед Хазгитай уулзсаныхаа дараа мэдэгдлээ гэж РИА Новости агентлаг дамжууллаа. “Орос улс Ливийн сөргөлдөөнийг улам дэвэргэн, гал өдөөж Хойд Африкийн бүс нутгийн аюулгүй байдал улам түгшүүртэй болж байна. Ийм нөхцөлд нийтийн аюулгүй байдлын төлөө бид ямар хариу барихаа судалж, ялангуяа аюулгүй байдлын хүчний бригад ашиглах эсэхийг судалж байна” гэж генерал Таунсенд мэдэгджээ.
Янз бүрийн хүний бүрэлдэхүүнтэй цэргийн ийм бригадыг АНУ түнш орнуудын цэргийн албан хаагчдыг өөрийн нь нутаг дэвсгэрт сургаж бэлтгэх ажилд ашиглахаар илгээдэг юм. Таунсенд бас Африк дахь түншээ “террорист ажиллагаа, хууль бус үйлдлийн сүлжээнд автсан” гэж нэрлэсэн байна. Москва маршал Халиф Хафтарын тэргүүлсэн Ливийн үндэсний армийн талд байлдуулахаар “Оросын хөлсний цэргүүд”-ийг дэмжихийн тулд сөнөөгч нисэх онгоцууд илгээлээ гэж үүний өмнө АФРИКОМ мэдэгдэж байсан юм.
ВЗГЛЯД хэвлэл ч бас Ливийн ойролцоох тэнгист агаарын тулалдаанд оросын МиГ-29 сөнөөгч онгоц оролцож нийслэл Триполийн боомтод байгаа Туркийн худалдааны хөлөг, тэнгисийн цэргийн хөлөг рүү дайрлаа гэж мэдээлж байсан. Ливийн үндэсний армид дөрвөөс найман МиГ-29 онгоц байгаа гэж байна.

ЭХ СУРВАЛЖ: "АРДЧИЛАЛ ТАЙМС" СОНИН