Цагдаагийн ажилтнууд өнгөт арьстан залууг саатуулах үедээ амь насыг нь хөнөөсний дараа Америк даяар үүсээд байгаа эмх замбараагүй байдлын талаар АНУ-ын Ерөнхийлөгч ард түмэндээ хандаж үг хэлэхдээ “Энэ эмх замбараагүй байдал бол дотоодын түрэмгийлэл, терроризм” гэсэн байна. Түүний мэдэгдлийн дүрс бичлэгийг Цагаан ордны “Twitter” хуудсанд нийтэлжээ. Эсэргүүцлийн хөдөлгөөнийхөн цагдаагийн хэсгийг эзэлж, сүм шатаан, Авраам Линкольнийн цогцолбор, Дэлхийн хоёрдугаар дайнд амь үрэгдэгсэдийн дурсгалын цогцолборыг сүйтгэж, хэд хэдэн хүн амь үрэгдлээ гэж Д.Трамп ярьжээ. “Энэ бол зүгээр эсэргүүцлийн тайван жагсаал биш, энэ бол дотоодын терроризм. Ямар ч гэмгүй хүний амь насанд хүрч, цус урсгаж байгаа нь хүн төрөлхтний эсрэг, бурхны эсрэг гэмт хэрэг” гэж АНУ-ын Ерөнхийлөгч хэлсэн байна.
Африк гаралтай, өнгөт арьстан Жорж Флойдыг Миннеаполис хотын цагдаа нар саатуулах үедээ амь насыг нь хөнөөсний дараа АНУ даяар эсэргүүцлийн хөдөлгөөн эхэлсэн юм. Тэгэхэд цагдаагийн ажилтны нэг нь залуугийн хүзүүн дээр өвдөглөн сууснаас Жорж Флойд “Би амьсгалж чадахгүй байна” гэж хэлсээр байтал цагдаагийнхан хайхрахгүй байснаас залуу амь алдсан. Цагдаагийнхны энэ хэрцгий байдлыг эсэргүүцсэн жагсаал цуглаан Америкийн бүхий л хотуудад өрнөн, сүүлдээ эмх замбараагүй байдал болж хувирснаар дэлгүүр худалдааны цэгийг дээрэмдэн автомашин шатааж эхэлснээр хууль сахиулагчид нулимс асгаруулагч хий, сүүлдээ холбооны аюулгүй байдлын ажилтнууд галт зэвсэг хэрэглэхэд хүрч байна. АНУ-ын нийслэл Вашингтон бусад 40 гаруй хотод хөл хорионы цаг тогтоогоод байгаа юм. Үүний зэрэгцээ Засгийн газар Үндэсний гвардад шинэ дайчилгаа явуулж хэдэн мянган хүн дайчлаад байна.

ЭХ СУРВАЛЖ: "АРДЧИЛАЛ ТАЙМС" СОНИН