Хятадын эрх баригчид төрийн мэдлийн хөдөө аж ахуйн томоохон аж ахуйн нэгжүүдээ америкийн хөдөө аж ахуйн бүтээгдэхүүн, ялангуяа буурцаг худалдан авахаа зогсоохыг хүссэн байна. Энэ арга хэмжээг Хонконгоос болоод АНУ-тай харилцаа хурцадсантай холбогдуулан авч байгаа гэж Bloomberg агентлаг эх сурвалжаас авлаа хэмээн мэдээлжээ. Энэ хүсэлтийг юун түрүү төрийн өмчийн “Cofco”, “Sinograin” компаниуд хүлээн авч Америкийн бүтээгдэхүүнийг авахаа зогсоолоо гэж эх сурвалж хэлсэн байна. Эх сурвалжийн хэлснээр Хятадын худалдан авагчид Америкаас авах гэж байсан гахайн махны захиалгаа бас өөрчилсөн гэнэ. Харин хувийн компаниуд бол импортоо зогсоох, хязгаарлах талаар ямар нэг үүрэг даалгавар аваагүй юм байна.
Энэ мэдээлэл үнэн бол Вашингтон, Бээжингийн нэгдүгээр сарын 15-нд хийсэн худалдааны талаар хийсэн хэлэлцээрийн нэгдүгээр шат биелэгдэхгүй болох аюулд хүрч байгаа юм. Энэ хэлэлцээрийн хүрээнд Хятад улс америкийн бараа бүтээгдэхүүнийг 2017 оны түвшинд буюу 200 тэрбум ам.долларын хэмжээнд хоёр жил барих ёстой юм. Дэлхийн хоёр том эдийн засагтай орны харилцааг коронавирус COVID-19-ийн цар тахлын дэгдэлт улам хурцатгаж байна. Дээр нь БНХАУ-ын эрх баригчид Бүх Хятадын Ардын төлөөлөгчдийн их хурлаар “Хонконгийн үндэсний аюулгүй байдлын тухай хууль” хэлэлцэж байгаа нь нөхцөл байдлыг улам хурцатгаж байна. Энэ хуулийг хэлэлцэж баталбал Бээжин тус районы автоном эрхийг үгүй хийх гэж байна гэж үзэж байгаа юм.

ЭХ СУРВАЛЖ: "АРДЧИЛАЛ ТАЙМС" СОНИН