Америкт цагдаа нар африк гаралтай өнгөт арьстан залуугийн амийг хөнөөснийг эсэргүүцсэн жагсаал Их Британийн нийслэл Лондонд боллоо. Хэдийгээр Их Британид коронавирусээс үүдэн хөл хорио тогтоосон хэвээр байгаа ч хүмүүс Трафальгарскийн талбай, АНУ-ын Элчин сайдын яамны дэргэд цугларан, арьсны өнгөөр ялгаварлахаа зогсоож, саатуулах үедээ хүч хэрэглэж хүний амь хөнөөсөн цагдаа нарт хатуу хариуцлага тооцохыг шаардсан байна. Жагсагчид “Жорж Флойдын амийг хөнөөсөн хүмүүст шударгаар хариуцлага тооц” гэсэн уриа лоозон, зурагт хуудас барьжээ. “Лондонд болсон эсэргүүцлийн жагсаал цуглааны үеэр 23 хүнийг төрөл бүрийн зөрчил гаргасны нь төлөө баривчилсан. Саатуулсан бүх хүнийг цагдаагийн хэсэгт аваачлаа” гэж цагдаагийн газар мэдээлснийг ТАСС агентлаг дамжуулжээ.

Берлин

Германы нийслэл Берлинд АНУ-ын Элчин сайдын яамны дэргэд мөн Флойдын амийг хөнөөснийг эсэргүүцсэн жагсаал болсон байна. Жагсагчид Флойдын амь насны төлөө болон африк гаралтай бусад иргэдэд шударгаар хандах, хүний амь хөнөөсөн цагдаа нарт шударгаар хариуцлага тооцохыг уриалсан зурагт хуудас уриа лозон барьжээ. Мауэрийн цэцэрлэгт хүрээлэн дэх берлиний хананы үлдэц дээр нас барсан Жорж Флойдын зургийг, амь алдахынхаа өмнө хэлсэн “Би амьсгалж чадахгүй байна” гэсэн бичээстэйгээр дүрсэлсэн байна.

ЭХ СУРВАЛЖ: "АРДЧИЛАЛ ТАЙМС" СОНИН