Оросын иргэний агаарын тээврийн компаниуд олон улсын агаарын нислэгээ долдугаар сарын 15-наас сэргээх саналаа ОХУ-ын Мэргэжлийн хяналтын газарт илгээсэн байна хэмээн эх сурвалж мэдээлснийг РБК хэвлэл дамжуулжээ. Оросын Засгийн газар олон улсын тогтмол болон тусгай үүргийн нислэгээ гуравдугаар сарын сүүлчээр зогсоож зөвхөн шуудангийн, сувиллын, ачааны болон хүмүүнлэгийн, Засгийн газрын тусгай шийдвэрээр хийх нислэгийг үлдээгээд байсан. Одоо дэлхийн 15 улс руу нисэх нислэгийг сэргээж магадгүй гэж байгаа ч энэ мэдээллийг албан ёсоор хэн ч батлаагүй байна.
Гадаадын иргэдийг улс орондоо зорчуулахгүй байх хугацааг ОХУ-ын Засгийн газрын тэргүүн Михаил Мишустин дөрөвдүгээр сарын сүүлчээр дахин сунгаад энэ хоригийг коронавирусийн халдварын тархалт зогсч нөхцөл байдал сайжирсны дараа цуцална гэж мэдэгдсэн.
Одоо Оросын 25 мянган иргэн гадаад улсад хөл хорионд ороод байна гэж Гадаад хэргийн сайд Сергей Лавров өнгөрсөн долоо хоногт мэдэгдсэн. Ийм болохоор ойрын үед тусгай үүргийн хэдэн арван нислэг үйлдэж тэднийг авчрахаар төлөвлөж байгаа юм байна. Гуравдугаар сарын 18-наас хойш 240 мянган орос хүн эх орондоо эргэн иржээ. АНУ-д эмх замбараагүй байдал үүссэнээс үүдээд эх орондоо эргэн ирэхийг хүсч байгаа орос хүний тоо эрс нэмэгдэж байна гэж ОХУ-ын Гадаад хэргийн яамны албан ёсны төлөөлөгч Мария Захарова тэмдэглэжээ.
ОХУ-д өнөөдрийн байдлаар коронавирус COVID-19-ийн 458 мянга орчим тохиолдол бүртгэгдэж 5.7 мянган хүн нас барж, 221 мянган хүн эрүүлжээд байна.

ЭХ СУРВАЛЖ: "АРДЧИЛАЛ ТАЙМС" СОНИН