Өмнөд Солонгосын зүгээс явуулж байгаа өдөөн хатгалгын асуудлаар Умард Солонгосын залуучуудын байгууллага нийслэл Пеньянд цуглаан зохион байгууллаа гэж БНАСАУ-ын Мэдээллийн төв агентлаг мэдээллээ. “Цуглаан дээр үг хэлсэн хүмүүс Өмнөд Солонгосын эрх баригчдын зүгээс бидний хамгийн эрхэм гэж үздэг дээд удирдлагыг минь хайр найргүй муухайгаар гутаан доромжилж байгаад эгдүүцэн дургүйцэл, уур хилэнгээ барьж чадахгүй, тэр бүү хэл харааж зүхэж байлаа” гэж мэдээллийн агентлагийн мэдээнд дурдсан байна. Эсэргүүцлийн цуглаанд залуучуудын холбооны төлөөлөгчид оролцсон байна. Улс орны удирдагчийг гутаан доромжилж байгаа нь Умард Солонгосын нийт ард түмнийг доромжилж байгаа хэрэг хэмээн энд үг хэлсэн хүмүүс онцлон тэмдэглэж байжээ.
Цуглаанаас Өмнөд Солонгосын эрх баригчид болон БНАСАУ-аас зугтан гарч байгаа хүмүүсийн өдөөн хатгасан үйлдлийг шүүмжилсэн тогтоолыг уншиж танилцуулсан байна. “Манай намыг, чучхегийн хувьсгалыг хамгаалж өөрийгөө сум, бөмбөг болгон хатуу бэлтгэнэ гэдгээ үг хэлсэн залуучууд бүгд илэрхийлж байлаа” гэж агентлагийн мэдээнд дурджээ. Үүний өмнө Солонгосын Хөдөлмөрийн намын Төв хорооны хэлтсийн орлогч эрхлэгч Ким Ё Чжон Өмнөд Солонгосыг хилийн районуудад ухуулгын материал тараадаг сурталчилгааны үйл ажиллагаагаа зогсоохыг уриалж байсан. Хэлтсийн орлогч эрхлэгч бас ийм үйл ажиллагаагаа зогсоохгүй бол Өмнөд Солонгосоос харилцаагаа тасалж магадгүй гэжээ.

ЭХ СУРВАЛЖ: "АРДЧИЛАЛ ТАЙМС" СОНИН