Хятад, Энэтхэг улсууд хилийн Ладакх бүс дэх нөхцөл байдлаа энхийн хэлэлцээрээр шийдвэрлэж чадлаа гэж Энэтхэгийн Гадаад хэргийн яамны хэвлэлийн алба зургадугаар сарын 7-нд мэдэгдсэн байна. Хоёр талын уулзалт хэлэлцээрээр хилийн шугамыг өмнө нь хэлэлцээрээр тогтоосон байсан тэр хэвээр үлдээхээр шийдвэрлэжээ. Хэлэлцээрт Энэтхэгийн талаас 14 дүгээр корпусын захирагч дэслэгч генерал Хариндер Сингх,  Хятадын талаас Хятадын Ардын чөлөөлөх армийн Өмнөд Шинжааны цэргийн тойргийн командлагч хошууч генерал Лю Линь нар оролцжээ. “Хятадын командлагчтай Чушул-Молдо районы Лех хотод зургадугаар сарын 6-нд уулзлаа. Уулзалт халуун дулаан, нөхөрсөг байдалтай боллоо. Хоёр тал хилийн район дахь нөхцөл байдлыг тогтворжуулах асуудлаар өмнө нь хоёр улсын тэргүүнүүдийн төрөл бүрийн хэлэлцээрээр тохирсныг баримтлан, хилийн энэ хэсгийн энхтайван байдал нь хоёр талын харилцааны нийтлэг эрх ашигт чухал ач холбогдолтой хэмээн энхийн замаар тогтворжуулахаар тохиролцлоо” гэж Энэтхэгийн Гадаад хэргийн яамны мэдээнд дурдсан байна. Өнгөрөгч тавдугаар сарын 5, 6-нд энэ районы Пангонг Цо нуураас холгүй хоёр талын хилчдийн хооронд хэд хэдэн удаагийн мөргөлдөөн болсон билээ. Хятадын цэргийнхэн Галван голын ойролцоо хэд хэдэн майхан босгож, барилгын ажил эхлүүлснээс энэ сөргөлдөөн эхэлсэн байна. 

ЭХ СУРВАЛЖ: "АРДЧИЛАЛ ТАЙМС" СОНИН