Сүүлийн өдрүүдэд АНУ-д бий болж байгаа хүндрэл хяналтаас гараад байна гэж “Wall Street Journal” болон NBC News-ын хамтран явуулсан судалгаанд оролцсон америкчуудын ихэнх нь үзэж байна. Судалгааны дүнгээс харахад нийт оролцогчдын 80 хувь нь улс оронд болж байгаа үйл явдал ямар ч удирдлага, хяналтгүй байна гэж байгаа бол дөнгөөж 15 хувь нь нөхцөл байдал хяналтад байгаа гэжээ. Үлдэх хэсэг нь тодорхой хариулж мэдэхгүй байна хэмээн хариулсан байна. Улс орны эдийн засгийн байдлын талаар судалгаанд оролцогчдын 46 хувь нь өнөөгийн байдалд “сэтгэл дундуур” гэсэн нь 2012 оны есдүгээр сарынхаас өндөр үзүүлэлт гэж NBC News тэмдэглэсэн байна. Дөнгөж таван хувь нь л эдийн засгийн байдлыг “онц” гэж дүгнэжээ.
Судалгаагаар улс оронд тулгамдсан асуудал байна уу гэж асуусан байна. Үүнд америкчуудын 63 хувь нь “маш их”, “ямар нэг хэмжээгээр” гээд гэр бүлийн гишүүдийн хэн нэг нь коронавирусийн халдвар авч магадгүй хэмээн эмзэглэж байгаагаа илэрхийлсэн байна. Гэхдээ энэ үзүүлэлт дөрөвдүгээр сарынхыг бодвол 10 хувь буурсан нь харагджээ. Судалгаанд оролцогчдын дийлэнх нь Жорж Флойдын үхлийн төлөө сэтгэл түгшиж байгаагаа илэрхийлсэн ч харин үүний дараа эхэлсэн эсэргүүцлийн хөдөлгөөнийг дурдаагүй байна. Нийт хүмүүсийн 59 хувь нь өнгөт арьстны үхлийн төлөө сэтгэл түгшиж байна гэсэн бол 27 хувь нь хүчирхийлэлд хүрээд байгаа эсэргүүцлийн хөдөлгөөнөөс эмээж байна гэжээ.
Тавдугаар сарын 28-наас зургадугаар сарын 2-нд явуулсан энэ судалгаанд сонгуулийн бүртгэлтэй нэг мянган хүнийг оролцуулсан байна.

ЭХ СУРВАЛЖ: "АРДЧИЛАЛ ТАЙМС" СОНИН