Өнөөдөр дэлхий даяар 820 сая гаруй хүн хангалттай хооллож чадахгүй байхад шинэ коронавирусийн цар тахлын улмаас энэ тоо нэмэгдэж, цаашлаад дэлхий дахиныг хамарсан хүнсний хомсдол үүсч магадгүй байна гэж НҮБ-ын ерөнхий нарийн бичгийн дарга Антониу Гутерриш урьдчилан анхааруулжээ. Үүний өмнө ч тус байгууллага “Библид дурдсан шиг” өлсгөлөн болж болзошгүй гэж анхааруулж байсан юм. А.Гутерриш “Тун яаралтай зохих арга хэмжээ авахгүй бол дэлхий дахиныг хамарсан хүнсний онцгой байдал бий болж хэдэн зуун сая хүүхэд, насанд хүрсэн хүнд урт хугацааны хүндрэл үүсч мэдэхээр байна” гэж хэлсэн байна. “Хүнсний бүтээгдэхүүн нийлүүлэх манай тогтолцоо муудаж, COVID-19-өөс болж бүтээгдэхүүн ч муудаж байна” гэж НҮБ-ын ерөнхий нарийн бичгийн дарга онцолжээ.

Улс орнууд хүн амд хүнс хүргэх тогтолцоогоо сайжруулах, үүний тулд юуны түрүүнд хүнсний үйлдвэрлэлийн салбарт ажилладаг ажилтан ажиллагсадыг хамгаалахын чухлыг НҮБ улс орнуудад зөвлөж байна. Мөн хүн амыг хүнсний бүтээгдэхүүнээр тасалдуулахгүйн тулд хүнс үйлдвэрлэгчид, хүнс тээвэрлэгчид, орон нутгийн захуудад дэмжлэг үзүүлэхийг зөвлөжээ.
Үүний зэрэгцээ хүн амын эмзэг давхарга болох хүүхэд, жирэмсэн болон хөхүүл эмэгтэйчүүд, өндөр настнуудыг хүнсээр хангах нийгмийн дэмжлэгийг өргөжүүлэх шаардлагатай гэж НҮБ үзэж байна. 2020 оны сүүлч гэхэд 265 сая хүн хүнсний ноцтой дутагдалд орж болзошгүй байна гэж НҮБ-ын Дэлхийн хүнсний хөтөлбөрийн шинжээчид үүний өмнө бас мэдэгдэж байсан. Тус хөтөлбөрийн гүйцэтгэх захирал Дэвид Бизли коронавирусийн цар тахлын дэгдэлт нь хүмүүнлэгийн салбарт дэлхийн хоёрдугаар дайныхаас ч илүү хямрал авчирна гэж мэдэгдсэн.

ЭХ СУРВАЛЖ: "АРДЧИЛАЛ ТАЙМС" СОНИН