Өнгөт арьстан Жорж Флойдыг цагдаагийнхан саатуулах үедээ хэрцгий хандсаны улмаас амь насыг нь хөнөөснийг эсэргүүцэж АНУ даяар, олон хотод жагсаал цуглаан болж байгаагаас Ерөнхийлөгч Дональд Трамп гудамжинд эргүүл хийх аюулгүй байдлын ажилтнуудын тоог нэмэгдүүлэх шийдвэр гаргасан. Гэтэл энэ дунд маш сайн зэвсэглэсэн ч, ялгах тэмдэггүй, өөрийн цол, нэрээ хэлэхийг хүсэхгүй цэргийнхэн гудамжинд олширлоо гэж CNN телевиз мэдээллээ. Телевизийн мэдээлж байгаагаар эмх журам сахиулах нэрээр ажиллаж байгаа цэргийнхэн, эрх хэмжээгээ хэтрүүлэн ардчилал, ард иргэдэд аюул учруулж магадгүй гэнэ. Сенатын гишүүн Крис Мерфи өөрийнхөө “Twitter” хуудсанд америкийн нууц цагдааг тэвчих хэрэггүй. Тэр Сенатын цөөнх ардчилагчдын тэргүүн Чак Шумер хоёр хэв журам сахиулах ажиллагаанд оролцож байгаа цэргийнхэн заавал ялгах тэмдэгтэй байх ёстой гэсэн хуулийн төсөл боловсруулж байгаа юм байна. Зарим хэвлэл энэ хүмүүсийг “ногоон хүн” хэмээн нэрлэж байна. “Ногоон хүн” гэдэг энэ нэршил Крым Украинаас салж Оросын бүрэлдэхүүнд орох үеэс эхлэн тархсан. Тэгэхэд Оросын зэвсэгт хүчний тусгай үүргийн салааны цэргүүд ямар ч таних тэмдэггүй хувцастайгаар хөрш улсынхаа нутагт зөвшөөрөлгүйгээр орж ажиллаж байсныг ингэж нэрлэж байжээ. Эхлээд Москва цэргүүдээ Украины хэрэг явдалд оролцуулж байгаагаа үгүйсгэж байсан ч дараа нь ОХУ-ын Ерөнхийлөгч Владимир Путин ийм баримт байгааг хүлээн зөвшөөрсөн. В.Путин бүр манай цэргийнхэн “маш зөв, гэхдээ шийдвэртэй, мэргэжлийн ажилласан” гэж онцолсон байдаг хэмээн lenta.ru хэвэлд бичжээ.

ЭХ СУРВАЛЖ: "АРДЧИЛАЛ ТАЙМС" СОНИН