Венесуэлийн Ерөнхийлөгч Николас Мадурогийн ОХУ-д хийх айлчлалд Москва, Каракас хамтран бэлтгэж байна гэж Венесуэлиэс ОХУ-д суугаа элчин сайд Карлос Рафаэль Фариа Тортоса мэдэгдсэн байна. Латин Америкийн орны тэргүүн тун удахгүй Орост айлчилна гэж Венесуэлийн Гадаад хэргийн яам мэдээлж байсан юм. Харин ОХУ-ын ерөнхийлөгчийн хэвлэлийн нарийн бичгийн дарга Дмитрий Песков энэ мэдээлийн талаар “одоохондоо яг тодорхой мэдээлэл алга” гэж байсан юм. ОХУ-ын Ерөнхийлөгч Владимир Путин, Венесуэлийн тэргүүн Николас Мадуро хоёр ойрын үед уулзахыг оросын Гадаад хэргийн сайд Сергей Лавров няцаагаагүй байна. Харин Каракасын хамтрагчтайгаа дээд хэмжээнд уулзахад Москва хэзээ ч бэлэн гэж мэдэгджээ. “Манай яам айлчлалын төлөвлөгөөг гаргаж байна, өдрийг нь товлохоороо мэдээлнэ” гэж Венесуэлийн Элчин сайд Уфад болсон аюулгүй байдлын талаарх олон улсын уулзалтын үеэр РИА Новости агентлагт мэдэгджээ. Каракасын мэдээлж байгаагаар Николас Мадурогийн Москвад хийх айлчлалын үеэр олон тооны хэлэлцээр байгуулж гарын үсэг зурах юм байна.

Венесуэльд нэгдүгээр сарын 22-нд сөрөг хүчнийхэн өнөөгийн ерөнхийлөгч Николас Мадурогийн засгийн газрыг эсэргүүцсэн жагсаал цуглаан зохион байгуулж, ердөө маргааш нь сөрөг хүчний удирдагч, парламентын спикер Хуан Гуайдо өөрийгөө тус улсын түр цагийн ерөнхийлөгч хэмээн зарласан юм. Түүнийг АНУ, Канад, Израиль, Европын холбоо дэмжсэн юм.
Харин ОХУ, Хятад, Куба, Мексик зэрэг хэдэн орон өнөөгийн ерөнхийлөгч Николас Мадурог дэмжиж байгаагаа илэрхийлээд байгаа юм. Москва бол Венесуэльд болж байгаа үйл явдлыг төрийн эргэлт хийх гэсэн оролдлого гээд тус улсын дотоод хэрэгт хөндлөнгөөс оролцохгүй байх ёстой гэж байна.

Эх сурвалж: АРДЧИЛАЛ ТАЙМС СОНИН