Румын улсын эрх баригчид Оросыг бүс нутагтаа аюул учруулж байгаа, дайсагнагч гүрэн хэмээн 2020-2024 оны үндэсний батлан хамгаалах стратегийн төсөлдөө тусгаад байна. Ерөнхийлөгч Клаус Йоханнисийн тэргүүлдэг Румыны Батлан хамгаалах дээд зөвлөлөөс өргөн бариад байгаа уг баримт бичгийг парламентын хоёр танхим дэмжвэл хүчин төгөлдөр болон үйлчилж эхэлнэ. “Румыны зүүн талаар хөрш болж, НАТО-той хиллэж байгаа энэ улс Крымыг бүхэлд нь булаан авч, Хар тэнгист давшилтын болон хамгаалах ажиллагаа цэргийн сургууль хийж байгаа нь старатегийн ашиг сонирхол, Европын холбоо, НАТО-гийн хилийн аюулгүй байдал, Хар тэнгисийн бүс нутгийн тогтвортой байдал, аюулгүй байдлыг хангахад ноцтой аюул учруулахаар байна” гэж Румыны Ерөнхийлөгчийн засаг захиргааны сайтад нийтэлсэн баримт бичигт өгүүлжээ. Улмаар ийм нөхцөл байдал нь улс орны аюулгүй байдалд сөргөөр нөлөөлж байна гэж онцолсон байна.
Румыны Ерөнхийлөгч Клаус Йоханнис баримт бичгийн талаар өгүүлэхдээ “Үндэсний аюулгүй байдлын стратеги нь “Аюул, эрсдэлээс хамгаалах иж бүрэн удирдлага” болно гэж тэмдэглэжээ. “Энэ бол бүс нутагт өрнөж байгаа үйл явдлын өрнөл, НАТО, ОХУ-ын харилцаа муудаж, терроризм дэлгэрч, кибер гэмт хэрэг, бусад дайралт өсөн нэмэгдэж байгаа өнөө үеийг харгалзан үзээд баримтлалаа өөрчилж байгаа хэрэг” хэмээн төслийг үнэлж К.Йоханнис хэлснийг сайтад нийтэлсэн байна.