Эх орны дайны ялалтын 75 жилийн ойд зоиулж Москвагийн Улаан талбайд хийх баярын парадад хүрэлцэн ирж оролцох гадаад орнуудын төрийн тэргүүн нарын нэрсийн урьдчилсан жагсаалтыг Кремль гаргаад байна. ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков “Урьдчилсан байдлаар жагсаалт гаргаад байна, ажил үргэлжилж л байна. Одоогоор Казахстан, Молдав, Киргиз, Тажикстан, Туркменистан, Узбекстаны төрийн тэргүүн нар ирэхээ баталгаажуулсан. Мөн Серб, Хорват, Абхаз, Өмнөд Осетийн удирдагчид ирнэ” гэж Д.Песков онцолжээ. Ялалтын баярын парадад хүрэлцэн ирэх төрийн тэргүүн нарын нэрсийн дотор одоогоор Беларусын Ерөнхийлөгч Александр Лукашенкогийн нэр байхгүй байна гэж тэр хэлсэн байна. Д.Песков эцэст нь ялалтын парадад хүрэлцэн ирэхээ баталгаажуулахыг гадаад орнуудын төрийн тэргүүнүүдээс хүлээж байгаагаа илэрхийлжээ.
Оросууд харин Украины Ерөнхийлөгч Владимир Зеленскийг энэ ялалтын баярын парадад уриагүй нь тавдугаар сарын 29-нд тодорхой болсон. Уг нь Оросын Ерөнхийлөгчийн туслах Юрий Ушаков Москва Украины Ерөнхийлөгч Владимир Зеленскийг парадад урина гэж 2019 оны наймдугаар сард ярьж байсан. Харин 2020 оны нэгдүгээр сард Украины Ерөнхийлөгч Владимир Зеленский “Зөвлөлт холбоот улс Дэлхийн хоёрдугаар дайн, хоморголон устгах явдлыг өдөөснийхөө төлөө хариуцлага хүлээх ёстой” гэж мэдэгдсэн. Эх орны дайны ялалтын 75 жилийн ойд зориулсан баярын парад энэ зургадугаар сарын 24-нд Москвагийн Улаан талбайд болно. Энэ өдрийг Ерөнхийлөгч Владимир Путины зарлигаар ажлын бус өдөр болгон зарласан байна.

ЭХ СУРВАЛЖ: "АРДЧИЛАЛ ТАЙМС" СОНИН