ОХУ-ын Үндсэн хуульд өөрчлөлт оруулахаар бүх нийтийн санал хураалт болох өдөр ажилтай байсан хүнд нэмэлт цалин өгнө, бусад нь ерийн ажлын өдрийнхөө цалинг авах болно гэж Холбооны зөвлөлийн Нийгмийн бодлогын хорооны тэргүүн Инна Святенко РИА Новости агентлагт мэдэгджээ. “Санал хураах өдөр ажилтай байсан хүмүүст нэмэлт цалин өгнө. Иргэд долдугаар сарын цалингаасаа бага цалин авах ёсгүй” гэж хатагтай И.Святенко хэлсэн байна.
Амралтын, баяр ёслолын буюу ажлын бус өдрийн цалинг Хөдөлмөрийн хуулийн 153 дугаар зүйлээр зохицуулдаг ч, онцгой тохиолдолд ингэж зохицуулж байгаа юм гэжээ. ОХУ-ын Үндсэн хуульд нэмэлт өөрчлөлт оруулах бүх нийтийн санал асуулгыг эхлээд дөрөвдүгээр сарын 22-нд явуулахаар товлож байсан ч коронавирусийн цар тахлын дэгдэлтийн улмаас хойшлуулаад байсан. Харин Ерөнхийлөгч Владимир Путин санал асуулгыг долдугаар сарын 1-нд явуулж энэ өдрийг амралтын өдөр болгохоо зарласан.