ОХУ-ын Ерөнхийлөгч Владимир Путины хэвлэлийн нарийн бичгийн дарга Дмитрий Песков Орост олигархи байхгүй гэж мэдэгдсэн байна. Үүний өмнө Беларусын Ерөнхийлөгч Александр Лукашенко “Оросын олигархиуд Беларусын хэт даврагч сөрөг хүчнийг санхүүжүүлж байна” гэж мэдэгдсэний хариуд Д.Песков ингэж хэлжээ. Кремлийн төлөөлөгч Беларусын төрийн тэргүүний буруутгалыг ийнхүү няцаагаад, олигархи гэдэг бол өөрийнхөө мөнгийг улс төрд нөлөөлөхийн тулд юм уу, өөрийнхөө улс төрийн хүсэл эрмэлзлийн төлөө зарцуулахыг оролддог бизнесменийг хэлнэ гэж тайлбарлажээ. Д.Песков бас “Беларусын сонгууль бол тус улсын дотоод хэрэг, Орос ч энд хөндлөнгөөс оролцохгүй, бусад улсууд ч оролцох ёсгүй” гэжээ. “Бидний зүгээс энэ сонгуульд нөлөөлөх ямар нэг юм харагдахгүй байна” гэж Д.Песков хэлсэн байна. Беларусын Ерөнхийлөгчийн сонгууль ирэх наймдугаар сарын 9-нд болно. Сонгуульд өрсөлдөхөөр 14 хүн нэрээ бичүүлээд байгаа ч тэд өөрийгөө дэмжигч 100 мянгаас доошгүй хүний гарын үсэг цуглуулах ёстой.
Нэр дэвшигчдийг долдугаар сарын 5-наас эхлэн 14-ний өдрүүдэд бүртгэсний дараа сонгуулийн өмнөх кампани эхлэх аж. Одоогоор таван нэр дэвшигч л шаардлагатай гарын үсгээ цуглуулаад байгаагийн дотор өнөөгийн ерөнхийлөгч Александр Лукашенко, Белгазпромбанкийн тэргүүн Виктор Бабарико, Өндөр технологийн паркийн захиргааны тэргүүн байсан Валерий Цепкало, парламентын доод танхимын депутат байсан Анна Канопацкая, ачаа тээврийн “Регион-8” нийгэмлэгийн орлогч дарга Наталья Кисель нар байна.