Дэлхийн бусад улс орны дотоод сөргөлдөөнийг шийдэх, бусад орныг сэргээх ажилд Америкийн цэргийнхэн цаашид оролцохгүй гэж АНУ-ын Ерөнхийлөгч Дональд Трамп Нью-Йорк муж дахь Вест Пойнтын цэргийн академийн төгсөгчдийн өмнө үг хэлэхдээ мэдэгдсэнийг Цагаан Ордон Facebook хуудсаараа шууд дамжуулан мэдээлжээ.
“Америкийн түүхийн шийдвэрлэх үед та бүхэн армид өөрсдийн ажлын гараагаа эхэлж байна. Америкийн цэрэг бусад орныг сэргээхийн төлөө ажилладаг биш, харин гадаадын дайснаас өөрийн улс орноо шийдвэртэй хамгаалах гэсэн үндсэн зарчимдаа эргэн орж байна” гэж Ерөнхийлөгч Дональд Трамп онцлон тэмдэглэсэн байна. Түүнийхээр АНУ-ын гол эрх ашгийг хамгаалах шинэ үзэл браимтлалд шилжиж байгаа гэнэ. Тэгэхээр цэргийнхний гол үүрэг нь хүмүүсийн дуулж сонсоогүй орнуудын дотоод сөргөлдөөнийг шийдэхэд оролцохоо больж байна гэсэн үг.
“Бид энэ дэлхийн цагдаа биш. Гэхдээ манай орон, манай ард түмэнд аюул заналхийлбэл бид хэзээ ч ухарч тээнэгэлзэхгүй гэдгийг бидний дайснууд мэдэж байгаа” гэж АНУ-ын Ерөнхийлөгч хэлжээ.
Гэхдээ Д.Трамп энэ зургадугаар сарын 9-нд сенат, конгрессын төлөөлөгчдийн танхимын тэргүүнүүдэд Вашингтон “Лалын улс”, “Аль-Кайда”, Талибан болон Афганистан, Ирак, Сири, Йемен, Иордан, Ливан, Турк, Сомали, Кени, Жибути, Нигерийн бүлэглэлтэй холбоотой хүчний эсрэг ажиллагаагаа үргэлжлүүлнэ гэж чиглэл өгсөн юм.
Үүний зэрэгцээ америкийн цэргийн албан хаагчид олон улсын энхийг сахиулах хүчний бүрэлдэхүүнд оролцон, мөн Синайн хойг, Косово дахь цэргийн ажиглагчдын багт орно, Филиппиний терроризмтэй тэмцэхэд тусална гэсэн байна.
Дэлхийн асуудал судалгааны Стокгольмын олон улсын хүрээлэнгийн 2019 онд нийтэлсэн тайлангаар бол АНУ цэргийн зардалдаа 649 тэрбум ам.доллар зардгаараа тэргүүн байранд орж байгаа юм хэмээн “Газета.Ру” тэмдэглэжээ. Өнөөдөр дэлхий даяар Америкийн 600 гаруй цэргийн бааз ажиллаж байгаа юм.

ЭХ СУРВАЛЖ: "АРДЧИЛАЛ ТАЙМС" СОНИН