Их Британийн нийслэл Лондон, Францын нийслэл Парист болж байгаа өргөн олны эсэргүүүцлийн жагсаалд оролцогсод цагдаагийнхантай мөргөлдөж эхэлсэн байна. Figaro хэвлэлд бичсэнээр бол 15-20 мянган хүн Парисын Бүгд найрамдахчуудын талбайд цугларан цагдаагийн ажилтнуудын арьс өнгөөр ялгаварладгийг эсэргүүцэн хууль бус цуглаан хийжээ. Цагдаагийнхан эхлээд хүмүүсийг тарахыг уриалсан ч шаардлагыг нь биелүүлээгүй учраас нулимс асгаруулагч хий ашиглахад хүрсэн байна. Улмаар жагсагчдаас 26 хүнийг баривчлан саатуулсан гэж Парисын цагдаагийн газар Twitter хуудсандаа бичжээ.
Их Британийн нийслэл Лондонд бас эсэргүүцлийн жагсаал хууль сахиулагчидтай мөргөлдөхөд хүрлээ гэж ВВС агентлаг мэдээлсэн байна. Энд бичсэнээр бол хэдэн зуун цагаан арьстан Уайтхолл дахь цэргийн дурсгалын цогцолбор, Парламентын талбайд Уинстон Черчиллийн хөшөөний дэргэд цугларчээ. Тэд британийн эзэнт гүрний хөшөө дурсгалыг “харуудын амьдрал чухал” буюу BLM хөдөлгөөний идэвхтнүүдээс хамгаалахаар цугларсан гэж мэдээгджээ. Харин ВВС агентлагийн мэдээлснээр бол цугларагсадын дунд барууны хэт даврагсад, хөл бөмбөгийн хөгжөөн дэмжигчид байсан гэнэ. Цагдаагийнхан цугларагсадыг тарахыг уриалсан ч тэд хууль сахиулагчдын өөдөөс лонх шил, чулуу, утаат шашк шидэлжээ. Үйл явдлыг Их Британийн Дотоод хэргийн сайд Прити Пател “байж боломгүй танхайрал” гэж нэрлэсэн байна.
Хууль сахиулагчдын арьсны өнгөөр ялгаварлахын эсрэг хөдөлгөөн АНУ болон бусад орнуудад хоёр долоо хоног гаруй үргэлжилсээр байгаа юм. Эсэргүүцлийн энэ хөдөлгөөн АНУ-ын Миннеаполис хотод өнгөт арьстан Жорж Флойдын амийг цагдаа нар хөнөөсний дараа эхэлсэн. Үүний өмнө Лондонд болсон жагсагчид, цагдаагийнхны мөргөлдөөний үеэр хууль сахиулагчдаас 23 хүн бэртэж гэмтсэн байдаг. Дэлхий даяар өрнөж байгаа эсэргүүцлийн энэ ажиллагаанд шоу-бизнесийн одууд, улстөрчид ч оролцож байна. Британийн нийслэлд болсон жагсаалд дуучин Мадонна суга таягтай ирж оролцжээ.

ЭХ СУРВАЛЖ: "АРДЧИЛАЛ ТАЙМС" СОНИН