Агаарын тээврийн компаниудын түүхэнд энэ 2020 он хамгийн муу жил болж байна гэж Олон улсын агаарын тээврийн холбоо (IATA) мэдэгдээд Хятадаас эхлэн тархсан коронавирусийн цар тахал дэлгэрч улс орнууд хилээ хаасны улмаас дэлхий дахины агаарын тээврийн компаниудын нийт алдагдал ойролцоогоор 100 тэрбум ам.долларт хүрч байна гэжээ. Энэ жил агаарын тээврээр зорчигчдын урсгал 54.7 хувь буурч, зорчигчдын тоо бараг хоёр дахин багасч арай гэж 2.25 тэрбум болсноор дэлхий дахины агаарын тээврийн компаниудын цэвэр алдагдал 84 тэрбум ам.долларт хүрэх нь гэж Олон улсын агаарын тээврийн холбооны таамаглалд дурдсан байна.
Холбооны тэргүүн Александр де Жюньяк сэтгүүлчдэд хандаж энэ оныг “Арилжааны нислэгийн түүхэнд хамгийн муу жил болж байна” гэжээ. “2008-2009 оны дэлхий дахиныг хамарсан санхүүгийн хямралын үед агаарын тээврийн компаниуд нийтдээ 31 тэрбум ам.долларын алдагдал л хүлээсэн юм шүү дээ” гэж тэр нэмж тодруулсан байна. Урьдчилсан төлвөөс үзэхэд 2021 онд агаарын тээврийн зорчигчдын урсгал 55 хувь нэмэгдэх юм байна. Гэхдээ л энэ нь 2019 оныхтой харьцуулахад 29 хувиар бага болохоор 15 тэрбум ам.долларын алдагдал хүлээнэ гэсэн үг. Ийм байдлаар коронавирусийн цар тахлын улмаас дэл­хийн агаарын тээврийн компаниудын нийт алдагдал 100 тэрбум хүрэх юм бай­на. Олон улсын агаарын тээврийн холбоо (IATA)-ийн тэргүүн Александр де Жюньякийн хэлж байгаагаар улс орнуудын агаарын тээврийн компаниуд өөр өөрсдийн Засгийн газартай нягт хамтран ажиллаж эрүүл ахуй, халдвар­гүй­жүүлэлтийн шаардлага, авах арга хэм­жээг бүрэн хангаж ажиллах хэрэгтэй гэнэ.
Улс орнууд хилээ нээж эхлэн, хүмүүс дахиад аялалд гарч байхад зорчигчдод “Ямар ч аюулгүй гэдэгт итгүүлж, нисэх хүслийг нь төрүүлэх” талаар агаарын тээврийн компаниуд анхаарч бэлэн байх ёстой гэж Олон улсын агаарын тээврийн холбоо анхааруулжээ.

ЭХ СУРВАЛЖ: "АРДЧИЛАЛ ТАЙМС" СОНИН