ОХУ-ын Үндсэн хуулийн нэмэлт өөрчлөлтийн талаарх бүх нийтийн санал асуулгыг ирэх долдугаар сарын 1-ний өдөр явуулна гэсэн Ерөнхийлөгч Владимир Путины зарлигийг хууль бус хэмээн иргэн Геннадий Рудяк Дээд шүүхэд өргөдөл гаргасан. Дээд шүүхэд бас Москва хотын Думын депутат Евгений Ступин бас яг энэ асуудлаар ханджээ.Тэрээр энэ өргөдлөө хамт ажилладаг Олег Шереметьев, улстөрч Валерий Соловей, хуульч Сергей Бочаров нарын хамт гаргасан гэжээ. Үүний өмнө иргэн Виктор Мещеринов яг ийм нэхэмжлэл гаргасныг Дээд шүүх хүлээн авахаас татгалзаж байсан хэмээн “Интерфакс” агентлаг бичжээ.
Энэ оны гуравдугаар сард Москвагийн сонгуулийн 2566 дугаар хэсгийн хорооны гишүүн Александр Артемьев “Сонгуулийн байгууллага нь зөвхөн сонгууль, санал асуулга явуулдаг болохоор Бүх Оросын санал асуулга явуулах нь хууль бус” гэсэн гомдлыг Дээд шүүх мөн хэрэгсэхгүй болгож байсан. Үндсэн хуульд нэмэлт өөрчлөлт оруулах тухай бүх нийтийн санал асуулга явуулах тухай В.Путины зарлигт байгаа зөрчлийг ОХУ-ын Дээд шүүх олж харахгүй байгаа. Шүүхийн шийдвэрт “ОХУ-ын Ерөнхийлөгчийн шийдвэр нь зохион байгуулалт, захиргааны шинж чанартай” гэжээ. Энэ зарлигаар Бүх Оросын санал асуулга явуулах бэлтгэл ажилд бүс нутгийн бүхий л захиргааны байгууллага оролцоно гээд заачихжээ. “Энэ зарлигаар сонгуулийн хэсгийн хороодын гишүүдэд шууд ямар нэг үүрэг хүлээлгэхгүй” гэж Дээд шүүхийн шүүгч Николай Романенков шийдвэртээ бичсэн байна.

ЭХ СУРВАЛЖ: "АРДЧИЛАЛ ТАЙМС" СОНИН