Тбилист, парламентын ордны дэргэд болж байгаа эсэргүүцлийн жагсаал цуглаан нь зөвхөн Орост л ашигтай гэж Гүржийн Ерөнхийлөгч Саломе Зурабишвили үзэж байна. Түүнийхээр бол Москва Гүржид дотоодын сөргөлдөөн үүсгэхийг сонирхож байгаа гэнэ. Энэ талаар Гүржийн Ерөнхийлөгч өөрийнхөө Facebook хуудсанд бичжээ.
“Орос бол манай дайсан, булаан эзлэгч. Тэдний удирдагч байгаа өнөөдрийн тав дахь цуваа нь ил тод хүчирхийллээс ч илүү аюултай. Улс орныг, нийгмийг бутаргах, дотоодод нь сөргөлдөөн үүсгэх сонирхол Оросоос өөр хэнд ч байхгүй, энэ бол тэдний хамгийн чаддаг зүйл” гэж Гүржийн ерөнхийлөгч мэдэгджээ. Түүнийхээр бол гүржид дотоодын сөргөлдөөн бий болгож байгаа хүчнийг “орос бодлогоор дэмжиж байгаа” гэнэ. Тэр бас цагдаагийнхныг эсэргүүцэгчидтэй нийлэхийг уриалсан Гүржийн экс ерөнхийлөгч Михаил Саакашвилигийн уриалгыг шүүмжилсэн байна.

ОХУ-ын Төрийн Думын депутат Сергей Гаврилов Гүржийн парламентын спикерийн суудал дээр сууж байснаас үүдэн Гүржийн нийслэл Тбилист олон нийтийн эсэргүүцлийн жагсаал цуглаан өнгөрсөн долоо хоногийн пүрэв гаргаас эхэлсэн юм. Сергей Гавриловын яриаг сөрөг хүчний депутатууд эсэргүүцэж Оросын төлөөлөгчдийг хуралдааны танхимаас гарахыг шаарджээ. Харин С.Гаврилов гадаад орны парламентын тэргүүний суудал дээр сууснаа “урьсан болохоор нь” гэж тайлбарласныг “Коммерсантъ” хэвлэл нийтэлжээ. Тэр бас би Грек, Ливан улсуудын парламентын спикерийн суудал дээр сууж үг хэлж байсан гэсэн байна.
Гүржийн цагдаагийнхан жагсагчдын эсрэг хаймар сум, нулимс асгаруулагч хий ашигласнаас 52 хүн бэртэж гэмтжээ.

Эх сурвалж: АРДЧИЛАЛ ТАЙМС СОНИН