Америкийн Elle сэтгүүлийн нийтлэлч сэтгүүлч Жин Кэрролл Америкийн өнөөгийн төрийн тэргүүн Дональд Трамп 1990-ээд онд өөрийг нь их дэлгүүрийн хувцас өмсдөг өрөөнд хүчиндсэн гэж мэдэгдсэн ч Д.Трамп түүнтэй хэзээ ч уулзаж байгаагүй энэ бол зохиомол буруутгал гэсэн байна.
Кэрроллынхоор бол энэ үйл явдал 1995 оны сүүлч юм уу, 1996 оны эхээр болсон гээд үүнийгээ өөрийнхөө The New York Magazine-д хэвлүүлсэн номдоо тодорхой оруулсан гэжээ. Бүсгүй Д.Трамптай Нью-Йоркийн тансаг Bergdorf Goodman их дэлгүүрт уулзахад барилгын салбарын магнат түүнийг ашигтай зөвлөгөөг хөтөлдөг сэтгүүлч хэмээн танимгайрч, би ч түүнийг таньсан гэжээ.

Тэр үед 52 настай байсан Кэрроллд Трамп эмэгтэй хүнд зориулсан бэлэг хайж явна гээд дараа нь тэд дотно яриа өрнүүлэн хувцас солих өрөөнд хамт орсон гэнэ. Гэтэл 50 орчим настай Д.Трамп түүнийг барьж авч үнсээд хүчиндсэн гэнэ.
Харин Ерөнхийлөгч Дональд Трамп үүнийг няцаагаад “Би амьдралдаа энэ хүнтэй уулзаж байгаагүй, Тэр өөрийнхөө номыг борлуулахын тулд ийм зүйл ярьж байна. Түүний номыг уран сайхны зохиол худалдаалдаг тасагт худалдвал таарна” гэжээ.
Гэхдээ олон нийтийн сүлжээний хэрэглэгчид Ж.Кэрролл, Д.Трамп хоёрын хамт байгаа нэг зургийг олж нийтэлсэн байна. Д.Трампын анхны эхнэр Иван, Кэрроллын тэр үеийн нөхөртэй дөрвүүлээ 1987 онд NBC телевизийн үдэшлэг дээр байсан нь тэр гэнэ.

Эх сурвалж: АРДЧИЛАЛ ТАЙМС СОНИН