Өөрийг нь төрийн тэргүүнээс огцруулах талаар сөрөг хүчнийхэн хангалттай гарын үсэг цуглуулж чадах юм бол намайг огцруулах асуудлаар 2020 онд бүх нийтийн санал асуулга явуулахад бэлэн байна гэж Венесуэлийн Ерөнхийлөгч Николас Мадуро мэдэгдсэн байна. “Ерөнхийлөгч Н.Мадурогийн бүрэн эрхийг цуцлах тухай бүх нийтийн санал асуулга явуулах асуудлаар 2022 он нэгдүгээр сарын 10-наас гарын үсэг цуглуулж болно. Тэд иргэдийн гарын үсгийг гудамжнаас ч цуглуулж болно” гэж тэр мэдэгдсэнээ “Twitter” хуудсаараа шууд дамжуулжээ. Өнгөрөгч 2019 оны нэгдүгээр сарын 10-нд тангараг өргөсөн түүний бүрэн эрхийн хугацаа 2025 онд дуусах юм. Иргэдийн “хангалттай олон” гарын үсэг цуглуулж чадах юм бол бүрэн эрхийн хугацааны дундуур бүх нийтийн санал асуулга явуулах боломжийг Үндсэн хууль олгоно гэж тэр хэлсэн байна.
Николас Мадурог тангаргаа өргөсний дараа 2019 оны нэгдүгээр сарын 21-нээс түүнийг эсэргүүцсэн өргөн олны хөдөлгөөн Венесуэль даяар өрнөсөн. Улмаар сөрөг хүчин олонх байдаг Үндэсний Ассамблейн тэргүүн Хуан Гуайдо өөрийгөө түр цагийн Ерөнхийлөгч гэж зарласан. АНУ тэргүүтэй барууны орнууд Х.Гуайдог төрийн тэргүүн хэмээн хүлээн зөвшөөрсөн. Харин Николас Мадуро болохоор парламентын тэргүүнээ АНУ-ын утсан хүүхэлдэй гэж нэрлэсэн. Москва бүр Хуан Гуайдогийн “ерөнхийлөгчийн статус” хууль бус гэж мэдэгдсэн. Орос, Хятад, Турк, Куба зэрэг орнууд Н.Мадурог хууль ёсны ерөнхийлөгч гэж дэмжиж байгаа юм.