Австрийн нийслэл Венад фашистын эсрэг хөдөлгөөнийхөнтэй хамтарсан курдуудийн жагсаал Туркийн өнөөгийн удирдлагын бодлогыг эсэргүүцэн дөрөв дэх өдрөө жагсаал цуглаан хийж байна. Улмаар тэднийг Туркийн залуус эсэргүүцэн өөр хоорондоо  мөргөлдсөний улмаас харилцан салют шидэлцжээ. Үүний улмаас хэв журам сахиулж байсан цагдаагийн таван ажилтан түлэгдэж, нэг ажилтан мөрөндөө шархадлаа гэж Австрийн цагдаагийн газар бямба гарагт мэдээллээ. Фаворитен дүүрэгт жагсч эсэргүүцлээ илэрхийлж байгаа курдууд болон зүүний идэвхтнүүдийн жагсаалыг Туркийн түрэмгий залуус тараахыг оролдсоноос энэ бүхэн үүдсэн байна. Цагдаагийнхан мөргөлдөөнийг тарааж зохицуулахаар очсон ч тэд хууль сахиулагчид руу  пиротехникийн хэрэгсэл, шил лонх шидэлжээ. Энэ бүхний улмаас цагдаагийнхан хүч нэмэгдүүлэн усан буу ашиглаж, нисдэг тэргээр эргүүл хийж байна. Зургадугаар сарын 25-нд бас Туркийн түрэмгий залуучууд хууль сахиулагчид руу чулуу шидэлснээс болоод цагдаагийн хоёр ажилтан, цагдаагийн албаны нохой бэртэж гэмтсэн. Курдууд эмэгтэйчүүдийн эрхийн төлөө, туркийн эрх баригчдын бодлогыг эсэргүүцэн Вена хотын Фаворитен дүүрэгт тайван жагсаал хийснийг туркууд тараахаар хүч хэрэглэж эхэлснээр энэ сөргөлдөөн эхэлсэн байна. Туркийн  зэрлэг залуус, хэт үндсэрхэг “Саарал чоно” бүлэглэлийнхэн жагсагчдыг гутаан доромжилж жагсаалыг нь тараахыг оролдож эхэлжээ. Пүрэв гаргаас курдийн жагсагчдыг фашизмыг эсэргүүцэгчид, зүүний байгууллагууд дэмжиж нийлсэн байна. Туркийн залуус эхлээд жагсагчид руу чулуу шил шидэлж байснаа эцэст нь пиротехник, шатаагч шидлэн дайрчээ. Угсаатны бүлэглэлийн хоорондох энэ мөргөлдөөнийг Австрийн эрх баригчид, улс төрийн хүрээнийхэн хэлэлцэж эхлээд байна. 

ЭХ СУРВАЛЖ :"АРДЧИЛАЛ ТАЙМС" СОНИН