ОХУ ирэх 2021 оны нэгдүгээр сараас электрон визэд шилжиж дэлхийн 113 орны иргэд Орост ирэхдээ заавал цаасан дээр хэвлэсэн виз авах шаардлагагүй болно гэж ОХУ-ын Гадаад хэргийн дэд сайд Евгений Иванов “Ъ” хэвлэлд мэдээлжээ. Орос өнөөдөр дэлхийн 60 улсын иргэдээс виз шаарддаггүй бол Европын болон Энэтхэг, Хятад, Турк зэрэг 53 орны иргэдэд 16 хоног хүртэл хугацаагаар зорчиход нь электрон виз олгож байх болж байна. Визийн дэглэмийг төрөл бүрийн хүчин зүйлээр тогтоосон гэж ГХЯ мэдэгджээ. Электрон виз олгохын тулд Гадаад хэргийн яам интерфейс сайтаа шинэчилж сайжруулсан гэнэ. Виз мэдүүлэхэд гарах алдааг багасгахын тулд сайтад нэмэлт тохируулга, урьдчилан анхаарулах мэдээлэл суурилуулжээ. Богино хугацааны ийм электрон визээр Оросын бүхий л бүсэд аялах боломжтой юм байна. Өмнө нь зөвхөн Владивосток, Алс дорнод, Калининград муж, Санкт-Петербург болон Ленинград мужид аялж болно гэж байв. Электрон визийн үнэ 50 ам.доллар байх аж. Орост жил бүр 1.5 сая орчим хүн нэг удаагийн болон хоёр удаагийн виз хүсч ирдэг гэж Е.Иванов мэдэгджээ.

ЭХ СУРВАЛЖ: "АРДЧИЛАЛ ТАЙМС" СОНИН