Орост болж байгаа Үндсэн хуулийн нэмэлт өөрчлөлтийн талаарх бүх нийтийн санал асуулгад иргэдийн 77.75 хувь оролцсоны саналын хуудасны 95 хувийг тоолоход Үндсэн хуульд нэмэлт өөрчлөлт оруулахыг санал өгсөн хүний 21.45 хувь нь эсэргүүцсэн байна гэж Сонгуулийн төв комисс урьдчилан мэдээлжээ.
Холбооны өмнөд тойрогт хамгийн өндөр буюу иргэдийн 75.6 хувь нь Үндсэн хуульд нэмэлт өөрчлөлт оруулахыг дэмжиж байгаа бол 24 хувь нь ч эсрэг санал өгчээ. Судлаачдын үзэж байгаагаар бол Үндсэн хуульд нэмэлт өөрчлөлт оруулахыг дэмжиж байгаа хүмүүсийн хувь одоохондоо өндөр байгаа гэнэ.
Харин Германы нийслэл Берлинд байгуулсан санал хураах байранд 2700 орчим хүн ирж саналаа өгсний 67 хувь нь ОХУ-ын Үндсэн хуульд нэмэлт өөрчлөлт оруулахын эсрэг саналаа өгсөн байна гэж Элчин сайдын яаман дахь сэтгүүлчид мэдээлжээ.

ОХУ-ын Үндсэн хуульд нэмэлт өөрчлөлт оруулах талаарх бүх нийтийн санал асуулга зургадугаар сарын 25-наас эхэлсэн. Иргэд оршин суугаа газартаа байгуулсан санал хураах байранд очиж саналаа өгөх бол Москва, Нижегород мужуудад онлайн хэлбэрээр саналаа өгч байгаа юм. Санал асуулга долдугаар сарын 1-ний 21:00 цагт дуусчээ. Оросын хамгийн баруун цэг Калининград муж санал авах байр хамгийн сүүлд хаагдах сүүлийн бүс болж байна. Сонгуулийн төв комиссын дарга Элла Панфилова санал асуулгын ирцийг “хангалттай” гэжээ.