АНУ-д байнга оршин суудаг, Саудын Арабын сэтгүүлч Жамал Хашоггиг 2018 оны аравдугаар сарын 2-ны өдөр Туркийн Стамбул дахь Саудын Арабын консулын газарт хөнөөсөн хэргийн шүүх хурал Стамбул хотноо эхэллээ. Мөрдөн байцаагчдын үзэж байгаагаар бол түүний амь насыг хөнөөхөөр Саудын Арабаас тусгай албаныхан зориуд ирсэн гэнэ.
Стамбулын прокурорын газар энэ хэрэгт Саудын Арабын тагнуулын газрын даргын орлогч, хэвлэл мэдээлэл хариуцсан зөвлөх байсан хан хүүгийн ойрын Мухаммед бин Салман Сауд аль-Кахтаниг буруутгаж байна. Өөр бас 18 хүнийг энэ хэрэгт сэжиглэж байгаа юм.
Хэрэв энэ хүн энэ хэрэгт буруутай нь нотлогдвол бүх насаар нь хорих ял онооно. Гэхдээ одоогоор буруутай гэж байгаа хүмүүсээс хэн нь ч шүүх хуралд ирээгүй болохоор яг ийм ял оноож эдлүүлэх магадлал багатай юм.

Саудын арабын эрх баригчид эхлээд Стамбулын консулын газарт ороод эргэж гарч ирээгүй сэтгүүлчийн хувь заяаны талаар тодорхой мэдээлэл өгөхөөс татгалзаж байсан ч дараа нь прокурорын газраас нь консулын газар зодоон болж сэтгүүлч амиа алдсан гэдгийг мөрдөн байцаалтын явцад тогтоолоо гэж мэдэгдсэн юм.
Үүний дараагаар Саудын Арабт нууц шүүх ажиллагаа болж таван хүнд цаазаар авах ял, гурван хүнд хорих ял оноосон. Шүүх хурлын үйл явц болоод ялыг эдлүүлсэн эсэх нь өнөө болтол тодорхойгүй байгаа.
НҮБ-ын тусгай илтгэгч Агнес Калламар мөрдөн шалгалтынхаа дүнд сэтгүүлчийн амийг хөнөөсөн хэрэг Саудын Арабынэ удирдлага, ялангуяа хан хүү Мухаммедын оролцоотой талаар хангалттай баримт байна гэж бичжээ.
Стамбулд болж байгаа энэ шүүх хуралд ямар гэрчүүд оролцож юу, юу тодорхой болохыг урьдчилан таамаглахад хэцүү байна. Сэтгүүлч Жамал Хашоггиг хөнөөсөн хэргийн дараа АНУ Саудын Арабын өндөр албаны хэд хэдэн хүний эсрэг хориг тавьсан юм.