Пеньян Вашингтонтой хэлэлцээрийн ширээнд суух бодолгүй байна гэж БНАСАУ-ын Гадаад хэргийн яамны АНУ хариуцсан газрын дарга Квон Чон Гын мэдэгдсэнийг Солонгосын мэдээллийн төв агентлаг мягмар гарагт дамжуулсан байна.
Үүний өмнө тус улсын Гадаад хэргийн сайдын нэгдүгээр орлогч Цой Сон Хи бас АНУ-тай хийх дээд хэмжээний уулзалтын тухай асуудлаар Пеньян америкийн талтай хэлэлцээр хийх шаардлагагүй гэж мэдэгдэж байсан юм.
“Амиа боддог зарим нь БНАСАУ-ын ГХЯ-ны тэргүүний орлогчийн мэдэгдлийн араас, буулт хийх нь зүйтэй гэж хэвлэл мэдээллийн хэрэгслээр бичиж байна. Дахиад онцлон мэдэгдье, бид АНУ-тай нэг ширээнд суух бодолгүй байна” гэж Квон Чон Гын мэдэгджээ.

Тэрээр Өмнөд Солонгосын зүгээс “БНАСАУ болон АНУ-ын хэлэлцээрт зуучлах хүчин чармайлтаа өөрчлөхгүй” гэж мэдэгдсэний хариуд ингэж мэдэгдээд “энэ үйлдэл нь харин ч солонгос хоорондын харилцаанд хор болж улам муутгаж байна” гэсэн байна. АНУ, БНАСАУ-ын анхны дээд хэмжээний уулзалт 2018 оны зургадугаар сарын 18-нд Сингапурт болж Умард Солонгосын удирдагч Ким Чен Ун, АНУ-ын тэргүүн Дональд Трамп нар хамтарсан тунхагт гарын үсэг зурсан. Энэ тунхгаар Пеньян Солонгосын хойгийг цөмийн зэвсэггүй болгох үүрэг хүлээсэн бол Вашингтон тус улсын аюулгүй байдалд баталгаа өгнө гэсэн юм. Харамсалтай нь үүний дараа Вьетнамын нийслэл Ханойд болсон дээд хэмжээний уулзалт амжилтгүй өндөрлөсөн. Хоёр орны тэргүүн дараа нь хоёр Солонгосын хилийн цэрэггүй бүс дэх Панмунжонд 2019 оны зургадугаар сарын 30-нд товч уулзахдаа хэлэлцээрээ ажлын түвшинд үргэлжлүүлэхээр тохиролцсон юм. Харин Стокгольмд болсон ажлын хэсгийн уулзалт амжилтгүй болж Солоносын төлөөлөгчид америкийн төлөөлөгчдийг өөрсдийнхөөрөө зүтгэж байна гээд уулзалтыг орхин гарсан юм.