НҮБ-ын дэргэдэх Хятадын байнгын төлөөлөгч Жан Зюнь БНХАУ Зэвсгийн худалдааны тухай олон улсын гэрээнд нэгдэж байгаа тухай баримт бичгээ НҮБ-ын Ерөнхий нарийн бичгийн дарга Антониу Гутерришт гардуулж өглөө гэж мэдэгдсэнийг Синьхуа агентлаг дамжууллаа.
Хятад улс Зэвсгийн худалдааны тухай олон улсын гэрээнд нэгдэж байгаа нь олон улсын болон бүс нутгийн аюулгүй байдлыг хангахын тулд БНХАУ зэвсгийн худалдаанд хяналт тавихад идэвхтэй оролцох бас нэг том алхам болж байна гэж Жан Зюнь тэмдэглэжээ.
Хятадын төлөөлөгч бас дэлхий дахины асуудлын эх сурвалж нь ганцхан талаас болж байгаа гэж онцолсон байна. Жан Зюнь АНУ-ыг шууд нэрлээгүй ч тухайн нэг орон зэвсэглэлд хяналт тавих олон улсын гэрээнээс гарч олон улсын байгууллагын үйл ажиллагаанд оролцохоос татгалзаж, “нэг талын бодлого, айлган сүрдүүлэх ажиллагаа явуулж байна” гэсэн байна.
Энэ бол дэлхий дахины стратегийн тэнцвэр, тогтвортой байдалд тодорхойгүй нөхцөл үүсгэж дэлхий дахины тулгамдсан асуудлыг шийдэх шгэсэн бүхий л орны хамтын хүчин чармайлтыг ноцтой эвдэж байгаа хэрэг” гэж тэр үгээ төгсгөжээ.

2014 оны арванхоёрдугаар сарын 24-нөөс хүчин төгөлдөр болон хэрэгжиж байгаа Зэвсгийн худалдааны тухай гэрээнд нэгдсэн орнуудын 107 дахь нь Хятад болж байна.
Зэвсгийн худалдааны тухай энэ гэрээгээр танк, байлдааны хуягт машин, том калибрын артиллерийн зэвсэг, байлдааны нисэх онгоц, нисдэг тэрэг, цэргийн хөлөг онгоц, пуужин, пуужингийн харвах суурь, буудлагын зэвсэг, хөнгөн зэвсэглэлийн худалдааны эргэлтэд хяналт тавьдаг юм.
АНУ энэ гэрээнд Барак Обамагийн засаглалын үед гарын үсэг зурсан ч өнөөгийн ерөнхийлөгч Дональд Трамп энэ гэрээнээс гарч байгаагаа 2019 оны дөрөвдүгээр сард мэдэгдээд байгаа юм.