Европын холбооны зөвлөлийг Герман улс түр зуур тэргүүлэх үед ойрын хугацаанд европын эдийн засгийг сэргээх төлөө төдийгүй, олон улсын хамтын нийгэмлэг дээр Европын холбоо өөрийн байр сууриа хадгалах баталгааг хангаж ажиллах болно гэж ХБНГУ-ын канцлер Ангела Меркель мэдэгдсэн байна. Тэрээр лхагва гарагт Европарламентад ойрын хагас жилд хэрэгжүүлэх хөтөлбөрийн талаар танилцуулахдаа ийн хэлжээ.
“Герман улс Европын холбоог даргалах үеийн гол зорилт нь хямралаас гаргахын тулд европын нэгдлийг бэхжүүлэх явдал. Бид Европын ойрын үед тогтвортой байлгах төдийгүй, Европыг өөртөө итгэлтэй, алсын хараатай, шинэ дэвшилд тэмүүлсэн, олон улсын тавцанд өөрийн байр сууриа хадгалсан байлгахыг хүсч байна” гэж германы канцлер тэмдэглэсэн байна.
Энэ бүх зорилтыг хэрэгжүүлэхийн тулд европын эдийн засгийг сэргээхийн тулд 500 тэрбум еврогийн сан байгуулъя гэсэн герман, францын хамтын саналыг ажил болгох ёстой. “Бидний зорилт бол ойрын хугацаанд зөвшилцөлд хүрэх, бид цаг алдаж болохгүй. Бүх чиглэлд зөвшилцөлд хүрэх ёстой” гэж Меркель хэлжээ.
Герман улс энэ долдугаар сарын 1-нээс эхлээд хагас жилийн хугацаанд Европын холбооны зөвлөлийг даргалах юм. Холбоог даргалагч нь хагас жилийн хугацаанд Европын холбооны тэргүүн байж өдөр тутмын тулгамдсан асуудлыг шийдвэрлэдэг юм. Холбоог даргалах Германы хөтөлбөр нь коронавирусын цар тахалтай тэмцэх, үр дагаврыг арилгах, хамгийн гол нь эдийн засгаа сэргээх, цаашдын стратеги төлөвөө тодорхойлох явдал гэнэ. Мөн байгаль хамгаалах, эдийн засагт ногоон технологийг хэвшил болгох, “тоон тусгаар тогтнолын үндэс” тоон эдийн засаг төлөвшүүлэх явдал гэж байна.