Францаас Вашингтонд суугаа Элчин сайд Филипп Этьенн, АНУ-ын Ерөнхийлөгчийн зэвсэглэлд хяналт тавих тусгай төлөөлөгч Маршалл Биллингслитэй уулзаж Орос, Хятадын цөмийн хөтөлбөрийн асуудлаар ярилцаж байр сууриа илэрхийлсэн байна. Энэ тухай Биллингсли твиттер хуудсаараа дамжуулан мэдээлжээ.
“Орос, Хятадын цөмийн зэвсгийн хөтөлбөртэй холбоотой асуудлаар Филипп Этьеннтэй маш ажил хэрэгчээр ярилцлаа. Бид зэвсэглэлд хяналт тавих талаар Франц улстай болон НАТО-гийн бүх холбоотнуудтайгаа нягт хамтран ажиллаж байна” гэж АНУ-ын Төрийн департаментын төлөөлөгч онцлон тэмдэглэсэн байна.
Биллингсли үүний өмнө Хятад улс цөмийн зэвсэг хорогдуулах Орос-Америкийн хэлэлцээрт нэгдэх ёстой гэж мэдэгдэж байсан юм.
Тусгай төлөөлөгчийн хэлж байгаагаар бол Хятадын коммунист нам сайн сэтгэл гарган энэ хэлэлцээрт нэгдэх юм бол дэлхий дахины аюулгүй байдалд чухал ач холбогдолтой гэнэ.
Харин Хятад улс энэ хэлэлцээрт нэгэдхгүй гэсэн байр суурьтай байгаа. Хэрэв АНУ өөрийн цөмийн зэвсгийн тоог өнөөгийн Хятадад байгаа зэвсгийн хэмжээнд хүртэл бууруулах юм бол БНХАУ энэ хэлэлцээрт нэгдэх болно гэж Хятадын Зэвсэглэлд хяналт тавих газрын захирал Фу Цун энэ долдугаар сарын 8-нд мэдэгдсэн юм. “Үнэндээ энэ боломжгүй зүйл гэдгийг бид ойлгож байна” гэж Хятадын дипломатч хэлжээ.
Стратегийн давшилтын зэвсэглэлийг хорогдуулах тухай Орос, АНУ-ын хэлэлцээрийн үйлчлэх хугацаа ирэх 2021 оны хоёрдугаар сард дуусах юм. Энэ хэлэлцээрийг сунгахад бэлэн байгаагаа Москва удаа дараа илэрхийлж байгаа ч Вашингтон байр сууриа тодорхой болголгүй өнөөг хүрч байгаа юм. АНУ төрөл бүрийн мэдэгдэл хийж байгаагийн дотор хэлэлцээрт Хятадыг оролцуулах санал байгаа юм.