Афганистаны “Талибан” хөдөлгөөнтэй байгуулсан хэлэлцээрийнхээ хүрээнд АНУ тус улсад байгаа цэргийн таван баазаас цэргүүдээ гаргахаар боллоо хэмээн Пентагоны албан ёсны төлөөлөгч Жонатан Хоффманы долдугаар сарын 14-нд тараасан мэдэгдэлд дурджээ.
Мэдэгдэлд “Энэ хэлэлцээр ёсоор АНУ Афганистанд байгаа цэргийн тоогоо 8600 болтол хорогдуулж таван баазаас цэргээ гаргана гэсэн. Бид энэ үүргээ биелүүллээ” гэсэн байна. Хоффманы хэлснээр бол одоо Афганистанд Америкийн найман мянга орчим цэрэг л үлдээд байгаа юм байна. АНУ өөрийн үндэсний ашиг сонирхлоо болон холбоотой, түншүүдээ хамгаалахын тулд бололцоотой бүхнийг хийх болно гэж Пентагоны төлөөлөгч онцолжээ. Тэр бас афганы сөргөлдөгч бүх тал хүчирхийллээ зогсоож, афганистан хоорондын хэлэлцээрийн ширээнд сууж тус улсад энх амгалан тогтоох хэрэгтэй байна гэж тэмдэглэжээ.