Цаазаар авах ялыг АНУ-ын хэд хэдэн мужид хэрэглэсээр байгаа бол Холбооны шүүхээс энэ ялыг хэрэглэлгүй 17 жил өнгөрсний хойно сая 47 настай, үндэсний үзэлт Даниэл Льюис Лиг цаазаар авсан байна. Түүнийг 1996 онд дээрэмдэх зорилгоор нэг гэр бүлийн гурван хүний амийг хөнөөж цогцсыг нь нууранд живүүлсэн хэрэгт буруутгажээ.
Цаазаар авах ялыг өнгөрсөн оны арванхоёрдугаар сард гүйцэтгэхээр төлөвлөж байсан ч тойргийн шүүх үүнийг нь хойшлуулсан гэнэ. Льюис Лигийн гарт хөнөөгдсөн талийгаачдын гэр бүлийнхэн түүнийг бүх насаар нь хорих хэрэгтэй гэж байсан ч Дээд шүүх саяхан ялын дээд хэмжээ цаазаар авах ялыг гүйцэтгэх нь зүйтэй гэсэн тогтоол гаргажээ. Цаазын ял гүйцэтгэхэд Дэниэл Льюис Ли “Би үүнийг хийгээгүй. Би амьдралдаа олон алдаа гаргаж байсан ч алуурчин биш. Та нар ямар ч буруугүй хүнийг алж байна” гэжээ.

АНУ-ын дээд шүүх цаазаар авах ялыг сэргээсэн 1976 оноос хойш Америкийн шоронгуудад 1500 орчим ялтныг цаазалсан юм байна. Тэдний ердөө гурвыг нь л холбооны шүүхийн шийдвэрээр гүйцэтгэжээ. Холбооны шүүхийн шийдвэрээр хамгийн сүүлд 2003 онд нэг гэмт хэрэгтнийг цаазалсан юм байна.
АНУ-ын 50 мужийн 17, Колумба тойрогт цаазын ял хэрэглэдэггүй, бусад мужуудад цаазаар авах ялыг хэрэглэсээр байгаа ч тун ховор гэнэ. Нийт цаазаар авах ялын талаас илүү хувийг Техас, Оклахома, Аризона, Миссури, Алабама, Флорида, Виржини гэсэн долоон мужид гүйцэтгэжээ. Одоо АНУ-ын холбооны шоронд цаазаар авах ялаа хүлээж байгаа 62 хоригдол байгаа юм байна.