Америкийн Tesla, SpaceX компанийн тэргүүн бизнесмэн Илон Маск манай гаргийн хамгийн баян 10 хүний жагсаалтад анх удаагаа орж ирлээ гэж Forbes сэтгүүл лхагва гарагт сайтаараа мэдээллээ.
Хэвлэлд бичсэнээр бол Илон Маскийн хөрөнгө өнөөдөр 70,8 тэрбум ам.доллар байгаа гэнэ. Маскийн хөрөнгө ингэж нэмэгдсэнийг Forbes сэтгүүл сүүлийн үед Tesla-гийн хувьцааны үнэ огцом өссөнтэй холбоотой гэж тайлбарласан байна. NASDAQ, электрон бирж дээр Tesla-гийн нэгж хувьцаа гуравдугаар сарын дунд гэхэд 400 ам.долараар үнэлэгдэж байсан бол өнгөрөгч лхагва гаргийн арилжаа дуусахад 1541 ам.доллар болж өссөн байжээ.

Ингээд Илон Маск манай гаргийн хамгийн баян хүмүүсийн жагсаалтад наймдугаарт бичигдэж байгаа бол есдүгээрт Энэтхэгийн Reliance Industries холдингийн эзэн Мукеш Амбани 68.5 тэрбумаар, аравдугаарт Google-ийг үндэслэгч Ларри Пейж 67.7 тэрбумын хөрөнгөөрөө жагсчээ.
Ер нь энэ жагсаалтад Microsoft-ын удирдагч байсан Стив Балмер 71.2 тэрбум, хөрөнгө оруулалтын Berkshire Hathaway сангийн эзэн Уоррен Баффет 72 тэрбум, Oracle корпорацийн үндэслэгчдийн нэг Ларри Эллисон 72,9 тэрбум, Facebook-ийн Марк Цукерберг 88.4 тэрбумын хөрөнгөөрөө орж байгаа бол эхний гуравт Microsoft-ыг үндэслэгч Билл Гейтс 112.4 тэрбум, Францын LVMH (Louis Vuitton Moet Hennessy)-ийн ерөнхий захирал Бернар Арно 113,4 тэрбум, Amazon корпорацийн тэргүүн Жефф Безос 178.9 тэрбумын хөрөнгөөрөө орж байна.