Хятадын эрх баригчид АНУ-гаас Сычуань мужийн Чэнду хот дахь Ерөнхий консулын газраа хаахыг шаардаж байгаагаа БНХАУ-ын Гадаад хэргийн яамны албан ёсны сайтад нийтэлсэн мэдэгдэлдээ дурджээ.
“Хятад улс Чэнду хотод АНУ-ын Ерөнхий консулын газар үйл ажиллагаа явуулах лицензийг хурааж авахаар шийдсэнийг БНХАУ-ын Гадаад хэргийн яам АНУ-ын Элчин сайдын яаманд 2020 оны долдугаар сарын 20-ны өглөө мэдэгдлээ” гэж мэдээлэлд дурдсан байна.

АНУ-ын засгийн газар тус улсын Хьюстон хот дахь Ерөнхий консулын газрыг ямар ч үндэслэлгүйгээр хаасны хариуд ийм арга хэмжээ авах нь хууль ёсны хэрэг гэж Хятадын Гадаад хэргийн яам үзэж байна. Бээжин бас энэ хариу арга хэмжээ нь олон улсын эрх зүй болон олон улсын харилцааны үндсэн хэм хэмжээ, дипломат практикт нийцсэн зүйл гэжээ. Хятадын дипломатууд алдаатай шийдвэрээ даруй залруулан хоёр талын харилцааг хэвийн болгох зайлшгүй нөхцөл бүрдүүлэхийг АНУ-д уриалсан байна. АНУ-ын Засаг захиргаа Хятадыг Хьюстон хот дахь Ерөнхий консулын газраа ахаахыг энэ долдугаар сарын 22-нд шаардсан юм. БНХАУ-ын Гадаад хэргийн яамны албан ёсны төлөөлөгч Ван Вэньбинь энэ шаардлагыг “нэг талаас явуулж байгаа улс төрийн өдөөн хатгалга” гэж нэрлэсэн.
Үүний хариуд Хятадын засгийн газар Ухань хот дахь АНУ-ын консулын газрыг хаах боломжийг судалж байна гэж Reuters агентлаг эх сурвалжаас авснаа мэдээлж байсан юм.
АНУ-ын Ерөнхийлөгч Дональд Трамп Хьюстон дахь консулын газрыг хаасныхаа дараа Хятадын дипломат төлөөлөгчдийн бусад газрыг хаана гэж мэдэгдээд байгаа юм.