Одоогоор коронавирусын халдвар бүртгэгдээгүй дэлхийн цөөхөн орнуудын нэгд тооцогдож байгаа улс бол Хойд Солонгос. Харин тус улсын удирдагч Ким Жон Ун өчигдөр улс төрийн товчоогоо яаралтай хуралдуулж, тус улсад covid-19 халдварын анхны тохиолдол илэрсэн байж болзошгүй талаар мэдээлээд онц байдал зарлажээ.
Халдварын сэжигтэй тохиолдол хэмээн бүртгэгдсэн хүн нь долдугаар сарын 19-ний өдөр Өмнөд Солонгосоос хууль бусаар хил давж ирсэн дүрвэгч ажээ. Одоогоор түүний орж ирсэн хилийн хэсэг дэх Кэсон хотод хөл хорио тогтоож, тусгаарлаад байгаа юм байна.
Эл явдалтай холбогдуулж БНАСАУ-ын удирдагч Ким Жон Ун дүрвэгчийн нэвтэрсэн хилийн хэсгийг хариуцдаг цэргийн анги нэгжүүдэд шалгалт хийж, буруутай этгээдийг хатуу шийтгэх, харуул хамгаалалтыг чангатгах тушаал өгчээ.