Америкийн Ардчилсан намаас Ерөнхийлөгчийн сонгуульд нэр дэвшээд байгаа АНУ-ын дэд ерөнхийлөгч асан Жо Байден гол гурван мужид сонгогчдын дэмжлэгээрээ өнөөгийн ерөнхийлөгч Дональдл Трампаас түрүүлж явна гэж CNN телевизийн нийтэлсэн санал асуулгын дүнгээр гарчээ.

Америкийн зүүн өмнөд Флорида мужид Байден 51 хувийн санал авсан бол Трамп 46 хувийн дэмжлэг авчээ. Баруун өмнөд нутгийн Аризона мужид Байден 49 хувийн дэмжлэг авсан байхад өнөөгийн тэргүүн 45, Мичиганд Байден 52, Трамп дөнгөж 40 хувийн дэмжлэг авсан байна. Санал асуулгыг нэрсийн жагсаалтад бүртгэлтэй сонгогчдоос авсан гэж телевиз мэдээлжээ. Эндээс үзэхэд энэ намар болох сонгуулиар хоёр нэр дэвшигч тун ойролцоо санал авахаар байна. Гэхдээ 2016 оны сонгуулиар Трамп энэ гурван мужид бүгдэд нь ялж байсан юм.

Нийт гурван мужаас санал асуулгад оролцогсдын 60 хувь нь Дональд Трампын коронавирусын халдварын тархалт болон арьсны өнгөөр ялгаварлахын эсрэг авч байгаа арга хэмжээнд сэтгэл дундуур байгаагаа илэрхийлжээ. Аризона мужид гэхэд л санал асуулгад оролцогсдын 60 хувь нь COVID-19-ийн эсрэг тэмцэх өнөөгийн бодлогыг таашаахгүй гэсэн бол Мичиганд 59, Флоридад 57 хувь нь сэтгэл дундуур байна гэжээ. Харин Аризона, Флоридагийн сонгогчдын 52 хувь нь Трампын эдийн засгийн бодлогыг дэмжиж байгаагаа илэрхийлсэн бол Мичиган мужид л 47 хувь нь эдийн засгийг Трамп сайн удирдаж байгаа гэсэн байна.

Ямар нэр дэвшигч “америкийг аюул хөнөөлөөс хамгаалж чадах вэ” гэсэн асуултад Мичиган мужид Байден 52 хувийн дэмжлэг авсан бол Трампыг 43 хувь нь л нэрлэжээ. Харин Аризонад санал тэнцсэн бол Флоридад Трамд 51 хувийн санал авч илүүрхсэн байна.
Коронавирусын халдварын тархалтын нөхцөл байдал АНУ-д улам хүндэрч байгаад америкийн иргэд сэтгэл түгшин Дональд Трамп коронавирустэй тэмцэж, намжааж чадахгүй байна, ийм болохоор түүний өрсөлдөгч Жо Байденд итгэл үзүүлье гэж байна хэмээн хэвлэлүүд долдугаар сарын 20-нд мэдээлсэн юм.