Европын зөвлөлийн парламентын холбоон дахь ОХУ-ын төлөөлөгчдийн бүрэн эрхийг сэргээж байгаа нь Крымыг Оросын нэг хэсэг гэдгийг Европт хүлээн зөвшөөрүүлэхийн төлөө нэг алхам хийж байгаа хэрэг гэж Украины Ерөнхийлөгч асан Петр Порошенко үзэж байна.
Москвагийн эсрэг хоригийг сунгахаар Киев оролдсоор байгаа ч энэ нь тийм ч амар биш байсан гэж П.Порошенко хэлжээ. Тэр Европын зөвлөлийн парламентын холбооны дараагийн чуулганаар Украины төлөөлөгчид түншүүдтэйгээ хамтран ажиллаж ОХУ-ын эсрэг “өргөн хүрээний” хоригийг цуцлуулахгүй байх арга хэмжээ авна гэж найдаж байгаагаа илэрхийлсэн байна.

Крымыг Орост нэгтгэсэн болон Украинд бий болсон нөхцөл байдлаас болоод 2014 оны дөрөвдүгээр сард Оросын төлөөлөгчдийн Европын зөвлөлийн парламентын холбоонд санал өгөх эрхийг нь хассан юм. 2015 онд энэ бүрэн эрхийг сэргээх асуудлыг хоёр ч удаа хэлэлцсэн боловч хоёуланд нь хориг хүчин төгөлдөр хэвээр үлдсэн юм. Үүнээс үүдээд Москва ч 2016-2018 онд өөрийн төлөөлөгчдйин бүрэн эрхийг сэргээх гэсэн өргөдөл илгээгээгүй юм. Харин 2019 оны зургадугаар сарын 26-ны хуралдаанаараа Оросын төлөөлөгчдийн бүрэн эрхийг сэргээсэн юм.

Харин ОХУ-ын Холбооны зөвлөлийн олон улсын асуудлаарх хорооны гишүүн Сергей Цеков Украины экс-ерөнхийлөгчийн хэлсэн үгийг “П.Порошенко тэнэг, үнэхээр алсын хараагүй хүн болохоо харуулж байна. Тэр дэмий зүйлээр оролдож, өөрийнхөө талынхныг хамгаалж байна” гэж шүүмжлээд “Европын зөвлөлийн парламентын холбоонд Оросын төлөөлөгчдйин бүрэн эрхийг сэргээсэн нь манай орны эсрэг тавьсан хоригуудыг цуцлах эхний алхам” гэж сэтгүүлчдэд мэдэгджээ.