АНУ-ын Ерөнхийлөгч Дональд Трамп японы Осака хотод болсон “Их -20”-ийн дээд хэмжээний уулзалтын дараа Умард Солонгосын тэргүүн Ким Чен Унтай уулзахаар хоёр Солонгосын хил дээрх цэрэггүй бүсийн Панмунжон тосгонд хүрэлцэн ирсэн байна.
Трамп, Ким Чен Ун нар хоёр Солонгосын хил хүртэл явган явахад тэдэнтэй хамт Өмнөд Солонгосын тэргүүн Мун Жэ Ин хамт явсан байна. Гэхдээ түүнийг хэлэлцээрт оролцсон эсэхийг хэвлэлүүд тодруулаагүй байна.

Чөлөөт бүсийн Эрх чөлөөний ордонд БНАСАУ-ын удирдагч Ким Чен Ун, АНУ-ын Ерөнхийлөгч ДональдТрамп хоёрын хийсэн уулзалтын дүнд хоёр тал “маш сайн хэлэлцээр”-ийн нарийн ширийнийг боловсруулах мэргэжлийн хэлэлцээрчдээс бүрдсэн тусгай хэсэг байгуулахаар тохиролцжээ.
“2-3 долоо хоногийн хугацаанд энэ баг ажлаа эхэлж юу хийж чадахыг нь харъя. Энэ бол том ачаа, маш нарийн, гэхдээ заримынх нь бодож байгаа шиг тийм ч хэцүү биш ажил” гэж АНУ-ын тэргүүн хэлээд америкийн талаас хэлэлцээрчдийн багийг БНАСАУ хариуцсан тусгай элч Стивен Бигэн ахална гэсэн байна.

Умард Солонгосын удирдагч Ким Чен Ун америкийн тэргүүнийг Пеньянд айлчлахыг урьсан бол хариуд нь Дональд Трамп БНАСАУ-ын удирдагчийг АНУ-д урьжээ. “Би түүнийг яг одоо урьж бүрэн чадна. Энэ бол түүхэн үйл явдал, дэлхий дахины хувьд аугаа их өдөр” гэж Трамп тэмдэглэжээ.
Төрийн тэргүүнүүд цэрэггүй бүсийн шугамын тал талд гарч, гар гараа барилцаж байснаа дараа нь Дональд Трамп Умард Солонгосын хилийг давж орсноор БНАСАУ-д хөл тавьсан АНУ-ын үүрэг гүйцэтгэж байгаа анхны ерөнхийлөгч болжээ. Энэ тухайгаа тэр “Энэ бол асар их нэр төрийн хэрэг” гэсэн байна. Үүний өмнө БНАСАУ-д АНУ-ын ерөнхийлөгч асан Жимми Картер 1994, 2010 онд, Билл Клинтон 2009 онд зочилж байсан юм.

Ким Чен Ун ч бас хилийн шугам давж, Өмнөд Солонгосын нутагт хөл тавихдаа хоёр гүрэн өнгөрсөн үеийн бүхий л бэрхшээлийг даван туулж, харилцааны шинэ хуудас нээнэ гэдэгт итгэлтэй байгаагаа илэрхийлжээ.
Үүний дараа АНУ,БНАСАУ-ын тэргүүнүүдийн хэлэлцээр эхэлсэн байна.

Эх сурвалж: АРДЧИЛАЛ ТАЙМС СОНИН