Японд олон нийтийн газар тамхи татахыг хориглох хууль баталснаар тамхичид эмнэлэг, эмийн сан, сургууль, засгийн газар болон орон нутгийн төрийн байгууллагуудын нутаг дэвсгэрт тамхи татахгүй болж байна. Зургадугаар сарын 28-нд Токиогийн Кита-ку дүүргийн захиргааны байшингийн дэргэдэх тамхины үнсний савуудыг хураан авч байгааг орон нутгийн телевизүүд харуулсан байна. Одоо тэндхийн тамхичид хоёр байшингийн дундах, хүн явдаггүй хэсэгт л тамхилж болох болж байгаа гэнэ. Шинэ хуулийг зөрчсөн хүнд 300 мянган иен буюу 2800 орчим ам.долларын торгууль ногдуулах юм байна. Өнөө хүртэл Японы зарим зоогийн газар тамхины өрөөтэй, нэг зуугаас дээш хавтгай дөрвөлжин метр талбайтай бааруудад зоогийн ширээний ард тамхи татахыг зөвшөөрдөг байсан юм. Харин энэ бүхэн 2020 оны дөрөвдүгээр сарын 1-нээс төгсгөл болох нь энэ. Энэ бүхэн 2020 оны зуны олимпын өмнө Японы эрх баригчид Токиод эрүүл амьдралын жишиг тогтоох гэсэн ажлуудын нэг нь.