Их Британи улс Европын холбооноос гэрээ хэлцэлгүйгээр гарах юм бол улс оронд 90 тэрбум фунт стерлинг буюу 114 тэрбум ам.долларын хохирол учирна гэж тус улсын Сангийн сайд Филип Хаммонд төлөөлөгчдийн танхимд үг хэлэх үеэрээ мэдэгдсэнийг Риа Новости агентлаг дамжууллаа.
“Европын холбооноос гэрээ хэлцэл хийхгүйгээр гарвал улсад 90 тэрбум фунт стерлингийн хохирол учирна гэж Засгийн газрын тооцоо өгүүлж байна. Энэ нь цаашлаад ирээдүйн зарлага, татварын бодлогод ч нөлөөлнө” гэж Ф.Хаммонд хэлсэн байна.

Сангийн сайд бас ямар ч гэрээ хэлэлцээргүйгээр Brexit-ийг ажил хэрэг болговол хэн ч Ерөнхий сайд боллоо гэсэн Их Британи аюул руу орно гэж онцолсон байна.
Тереза Мэйг Ерөнхий сайдын албан тушаалаас огцорно гэсний дараа Их Британид Консерватив намын дарга, Ерөнхий сайдын суудлын төлөөх тэмцэл өрнөж эхэлсэн. Сүүлийн мэдээллээр бол Гадаад хэргийн сайд асан Борис Жонсон, түүний залгамжлагч Жереми Хант нар Ерөнхий сайдын суудалд өрсөлдөх нь тодорхой болоод байгаа юм.