Их Британи Brexit-ийн нөхцөлийн талаар ямар ч гэрээ хэлэлцээргүйгээр Европын холбооноос аравдугаар сарын 31 гэхэд гарахад бэлэн байна гэж Консерватив намын дарга, Ерөнхий сайдын төлөө өрсөлдөж байгаа хүмүүсийг тэргүүлж байгаа Борис Жонсон The Sunday Telegraph сонинд өнгөрөгч бямба гарагт өгсөн ярилцлагадаа онцолсон байна.
“Бид бүр гуравдугаар сарын 29 гэхэд бэлэн байсан. Одоо аравдугаар сарын 31 гэхэд бүр ч бэлэн байна. Манай түншүүд үүнийг ойлгох нь маш чухал. Тэд бидний өөдөөс хараад “Ээ бурхан минь, британичууд үнэхээр явахад бэлэн болчхож. Эд чинь ийм л нөхцөлөөр явах гэж байгаа юм байна” гэж бодох ёстой.
Их Британи 2019 оны гуравдугаар сарын 29-нд буюу холбооноос гарах өргөдлөө албан бичгээр илэрхийлснээс хойш хоёр жилийн дараа Европын холбоог орхих ёстой байсан юм. Харин Төлөөлөгчдийн танхимын депутатууд Ерөнхий сайд Тереза Мэйгийн Европын холбооны удирдлагуудтай хийх Brexit-ийн хэлэлцээрийн төслийг гурван удаа буцаасан юм. Энэ бүхний дүнд Европын холбоо Brexit-ийн товыг эхлээд дөрөв, тавдугаар сард болгосноо, дараа нь аравдугаар сарын 31 болгож сунгасан юм.