Умард Солонгосын нийслэл Пеньянд сурацдаг австрали оюутныг БНАСАУ-ын эрх баригчид тагнуул хийсэн, улсынх нь эсрэг дайсагнасан ажиллагаа явуулсан хэмээн эх орноосоо хөөлөө. Умард Солонгосын хэвлэлүүдэд бичсэнээс үзвэл оуютныг “Интернэт ашиглан БНАСАУ-ын эсрэг дайсагнасан ажиллагаа явуулсан” гэж саатуулсан юм байна. Мөрдөн шалгах явцад оюутан залуу Умард Солонгосын эсрэг хэвлэл мэдээллийн хэрэгслүүдийн захиалгаар гадаад оюутны үнэмлэхээ ашиглан нийслэл Пеньяны гэрэл зургуудыг авч дамжуулж байжээ. Австрали оюутан “тагнуулын ажиллагаа явуулснаа үнэнчээр хүлээн зөвшөөрч” өөрийг нь өршөөхийг гуйсан байна. Умард Солонгосын Засгийн газар “хүмүүнлэгийн үүднээс хандаж” түүнийг шийтгэсэнгүй, зөвхөн эх орноосоо хөөх шийдвэр гаргажээ. Пеньяны Ким Ир Сений нэрэмжит Их сургуулийн солонгос хэлний салбарт магистрын зэрэг авахаар суралцаж байсан 29 настай оюутныг зургадугаар сарын 27-нд сургуулиас нь хөөж, ийнхүү эх орноосоо гаргажээ.