АНУ-ын Ерөнхийлөгч Дональд Трампын нэр хүнд тангараг өргөснөөс хойш дээд амжилт тогтоолоо гэж ABC телевиз болон The Washington Post сонины захиалгаар судалгаа явуулсан нийгмийн судалгааны Langer Research Associates алба мэдээлсэн байна. Судалгааны дүнгээс үзвэл судалгаанд оролцсон иргэдийн 44 хувь нь Трампын үйл ажиллагааг сайн гэж үнэлсэн бол 53 хувь нь эсрэг санал өгч, гурван хувь нь хариулж мэдэхгүй байна гэжээ. Үүний өмнө мөн АВС телевиз The Washington Post сонины 2017 оны дөрөвдүгээр сард явуулсан судалгаагаар Трампын нэр хүнд 42 хувь хүрч байсан юм.
Судлаачид эдийн засгийн салбарт гарч байгаа ахиц, амжилт нь Д.Трампын нэр хүндийг ийн өсгөж байна гэж дүгнэжээ. Америкийн тэргүүний эдийн засгийн бодлогод иргэдийн 51 хувь нь таатай үнэлгээ өгсөн бол 41 хувь нь эсрэг санал өгчээ. Харин АНУ-ын гадаад бодлогыг иргэдийн 40 хувь нь таатай үнэлсэн байна. Гэтэл судалгаанд оролцогчдын гуравны нэг болох 37 хувь нь Ерөнхийлөгчийг эгүүлэн татах нь зүйтэй гэжээ. Судалгааг зургадугаар сарын 28-ны өдрөөс долдугаар сарын 1-нийг хүртэл улс орон даяар мянга орчим хүнээс утсаар авсан байна.