Гүржийн сөрөг хүчний “Рустави-2” телевизийн хөтлөгч Георгий Габуния нэвтрүүлгийнхээ үеэр ОХУ-ын Ерөнхийлөгч Владимир Путиныг доромжилсон үг хэлсний төлөө телевизийн гадаа олон хүн жагсч, үүнийхээ төлөө уучлал гуйх, телекомпанийг хаахыг шаардсан байна. “Бид бүрэн аюулгүй байдал хангах хүртэл нэвтрүүлгээ зогсоож байна. Бүх сэтгүүлч, ажилтнууд ажил дээрээ цуглан, хэвлэл мэдээллийн хэрэгслийн хараат бус байдал, телевизийг бүрэн хамгаалахыг Засгийн газраас шаардаж байна” гэж тус телевизийн ерөнхий редактор Ники Гварами хэлснийг “Новости Грузия” хэвлэл эш татжээ.

Телевизийнхний хэлснээр эсэргүүцлийн жагсаалд 200 орчим хүн оролцож тавьсан шаардлагыг нь биелүүлэх хүртэл тарахгүй гээд барилга руу өндөг шидэлж байв.
Телевизийн хөтлөгч Георгий Габуния долдугаар сарын 7-ны ням гарагт өөрийн “P.S.” зохиогчийн хөтөлбөрийнхөө үеэр Оросын Ерөнхийлөгчийг доромжлон ярьсан юм байна. Сэтгүүлчийн энэ яриа Гүржийн Ерөнхийлөгч Салом Зурабишвили, Ерөнхий сайд Мамука Бахтазе, парламентын спикер Арчил Талаказе нарын сонорт хүрчээ. Гүржийн Гадаад хэргийн яам ч сэтгүүлчийн энэ үйлдэл нь Москва, Тбилисийн харилцааг хурцатгана гэсэн байна. Гадаад хэргийн яам Габуниягийн энэ үг бол “Үг хэлэх эрх чөлөөтэй ямар ч холбоогүй” гээд “цэвэр өдөөн хатгалга” гэжээ.